La Usc di Ladins

L sito Vivoscuola, olache l’é stat publicà duc i ac aministratives del concors per l’encèria de Sorastant de la Scola Ladina de Fascia, à publicà en jebia ai 22 de messèl l’ejit del concors con doi proes a ousc che se à dejout en mercol ai 21 de messèl.

La comiscion de ejam tolea ite l dirigent de l’Istitut »La Rosa Bianca – Weisse Rose« de Ciavaleis Marco Felicetti con funzion de president, l diretor de l’Ofize de pianificazion del sistem educatif de la PAT Sergio Dall’Angelo, l dirigent de l’Istitut de Formazion profescionèla »Sandro Pertini« de Trent Nicola Parzian e la funzionèra de la PAT Paola Ciurletti desche secretèra. I componenc ge à assegnà la valutazion maora al professor Federico Corradini.

Sia encèria vegnarà ofizialisèda bonamenter en lunesc ai 26 de messèl con la delibera de nomina da man de la Jonta provinzièla, dapò Corradini cognarà fèr n meis de tirocinie e passaje de consegnes col sostitut sorastant Claudio Valentini, che à ret la Scola de Fascia te l'ultim an dò l penscionament de la ex sorastanta Mirella Florian e con la fin de aost l fenirà ence el sie servije profescionèl te scola. 

Federico Corradini l’é de naa da Fiem ma l’é enciasà te Fascia, olache l’ensegna jà da n muie de egn te la Scola Ladina e ti ultimes 12 egn l’à corì l’encèria de referent de la scola mesènes de Sèn Jan e Moena, olache l’à semper desmostrà sia competenza e fidaboltà.

L’é atif te n muie de autra scomenzadives culturèles, tant te Fiem che te Fascia, olache l se à fat aprijièr ence desche ensegnant de l’UTETD, l’Università per la jent de età e del temp desponibol.

Podaron l cognoscer miec su La Usc stampèda de vender ai 30 de messèl.

 (Lucia Gross)