La Usc di Ladins

En lunesc ai 15 de setember a Vich se à costituì ofizialmenter la Sociazion Articolo 6, na realtà che era stata tegnuda a batum da la senatora Elena Testor e sostegnuda da la Region Trentin Südtirol con l assessor ladin Luca Guglielmi con chela de stravardèr e valorisèr l patrimonie linguistich e cultural de la mendranzes a na vida desferenta e coordenèda. La neva sociazion tol ite raprejentatives de la mendranzes recognosciudes da la lege 482/99 e per la sotescrizion del at costitutif esponenc de istituzins, sociazions, organismes culturai, firmes, enc no profit e aministrazions locales da duta la Tèlia se à binà tel studie del notèr Alessandro Franco.

De chesta neva sociazion fèsc pèrt: Open Cooperativa sociale del Parco Culturale Palmieri Martignano (griki); Terra de Punt e My cultura (sardi); Associazione Innió e Clape de culture Patrie dal Friul APS (furlegn); Kroa tarantata (croac del Molise); Comune Piana degli Albanesi (arbëreshë); Omnium Cultural de l’Alguer (catalans); Chambra d’Oc (ozitans/franzousc/francoprovenzièi); Union Ladina Val Biois e Union ladina Agordin Sotciusa (ladins de Belun) e Cooperativa Inout (ladins de Fascia), la soula realtà de la mendranza ladina de la valèdes entorn l Sela te chesta sociazion.

L Istitut Cultural Ladin Majon di Fascegn no fèsc pèrt, amancol endèna, ajache tant te la Comiscion Culturala che tel Consei de Aministrazion de la istituzion culturala scientifica ladina de Fascia l é stat uzà fora dubies sul investiment de temp e ressorses per chest obietif. Ence l’Union Generela di Ladins dla Dolomites, do aer valutà l envit, l’à dezidù de no tor pèrt, ajache sia senta la é tel Südtirol e la Provinzia de Busan no se à mai emprevalù de la Lege 482. Apede chest l’Union Generela fèsc jà pèrt de la FUEN, Union Federalistica dles Nazionalités Europeanes, sostegnuda da la Provinzia Autonoma de Busan e da la Region Trentin Südtirol, che l’à na strutura organisativa staifa, dotazion finanzièla e n grop de lurier struturà dedicà a la mendranzes. L’Union Generela conscidra ence che na sociazion che tol ite enc publics, firmes privates e organisazions de volontariat no sie la più percacenta, ajache l sostegn per la ativitèdes culturales volontères e per la istituzions l é deldut desferent. N auter pont critich uzà fora ence da componenc istituzionèi de la mendranza ladina storica del Sela l é l fat che vegn tout ite i “neo Ladins” de la provinzia de Belun.

Dut l articol l é su La Usc stampèda dai 19 de setember, da troèr ence te la boteighes de sfoes.
Sul sit www.lausc.it se per fèr l abonament al e-paper.




 (Lucia Gross)