La Usc di Ladins

Dai 22 ai 24 de otober a Riva del Garda l é stat metù a jir Didacta, la fiera dedichèda a l’istruzion. Ence la Scola de Fascia à tout pèrt a chest event, olache l é stat portà l’esperienza del percors de formazion per l ensegnament di lengac fat da la ensegnantes de la trei scolines de Soraga, Pera e Cianacei. N grop de dozenc e dozentes de duc i livie de scola é jic a Riva ai 22 de otober e i à podù veder e tor pèrt a desvaliva scomenzadives, seminaries, workshop o spazies espositives de ogne sort, ma soraldut fèr grop desche Scola de Fascia tel seminarie che é stat tegnù da la coordenadora pedagogica de la scolines Tatiana Soraperra e da la formadora d.ra Paola Celentin.
Te chisc referac l é stat metù al luster l percors fat da la maestres de la trei scolines de Fascia per troèr la strategies che permete de miorèr l ensegnament te più lengac e donca de meter ju fondamenc emportanc te na realtà desche chela de Fascia per balanzèr i doi lengac de la comunanza, ma de gran utol ence te ogne situazion olache l ensegnament se ouc a bec che rejona lengac desferenc, ence per la prejenza semper maora de families che à na storia de migrazion.

Se pel lejer dut su La Usc nr 42 dai 31 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Lucia Gross)