La Usc di Ladins

Turnoi de ping pong de Gherdëina
N sada ai 8 de nuvëmber dala 13:00 inant tl tennis curì te Sëlva
L Tennis Club Gher­dëina mët a jì n turnoi de ping pong per duc y dutes tl tennis curì te Sëlva, n sada ai 8 de nu­vëmber dala un do­mesdì inant.
Peles y codles da ping pong vëniel metù a despusizion.
Per nfurmazions y per se scrì ite pòssen cherdé su l numer de telefonn 340 9269085.
L unirà nce trat ora de biei pesć danter chi che fej pea.

Al vëgn chirí jobleres y jobleri
Sentada de informaziun y abinada dl grup por la presentaziun dla opereta ladina originala »Franzi« de Iaco Rigo y Alex Trebo söl program en ater ann les prömes döes edemes d’agost (6, 7, 8, 9, 13, 14, 15 y 16 d’agost) a La Pli de Mareo
En jöbia, ai 6 de novëmber 2025, dales 20:00, te Salf dles Uniuns a La Pli de Mareo vëgnel dé informa­ziuns plü avisa söl’opereta popolara ladina nöia dal inom »Franzi«, scrita da Iaco Rigo (idea y libreto) y Alex Trebo (musiga). L’opereta ladina nöia fej pert di proiec culturai dl PNRR por »La Pli, n tesur da de­scurí«, coordiná tl inom dl Comun de Mareo dal’uniun culturala y volontara EPL-Ert por i Ladins.
Dötes y düc chi che á ligrëza y motivaziun da tó pert, y dantadöt les uniuns dl paisc desco Uniun de Teater, Cor y Musiga, é inviá da gní!

En chësc iade él »Döta colpa de Mona Lisa«
I mëmbri dl’Uniun Teater La Ila jará defata sön palch: »Döta colpa 
de Mona Lisa« é le toch che sará da odëi danter i 31 d’otober y i 9 de novëmber sön la paladina dla Ciasa dla Cultura
L’Uniun Teater La Ila é tl laur da arji­gné ca le teater da rí »Döta colpa de Mona Lisa«. La rejia é de Erika Castlunger, les löms de Luca Pizzinini. Sön paladina él da odëi: Alessandro Bonfanti, Amy Crazzolara, Marco Moscon, Tobias Stampfer, Andreas Peccei, Andy Pizzinini, Roland Pizzi­nini, Sabine Rudiferia y Susann Tavella. Les rapresentaziuns é: vën­dres 31 de otober dales 20:30, domë­nia 2 de novëmber dales 17:00, mer­tesc ai 4, vëndres ai 7, sabeda ai 8 dales 20:30 y domënia 9 de novëmber dales 17:00 tla Ciasa dla Cultura a La Ila. Prenotaziuns: 352 0949399 dales 15:00 ales 19:00.

»Asmara« – söi fostüs dla colonisaziun
Le Consëi de formaziun Badia inviëia a n referat cun proieziun de fotografies dal titul »Asmara – n iade visual sön i fostüs dla storia dla colonisaziun taliana tl’Eritrea«
La serada vëgn tignida en lönesc ai 3 de novëmber dales 19:30, tla Ciasa J. B. Runcher a Badia. Le fotograf documentar Andreas Trenker – professur dla Université Lëdia de Balsan – nes tol para ala chirida de fostüs tl zënter de Asmara, la capitala dla Eritrea, sön chëres che ê inlaota les strades Via Pusteria, Via Brennero y Via Adige. La cité é carate­risada da süa architetöra moderna, che vëgn dal tëmp dla colonisaziun taliana. 
Mo chësta arpejun culturala fej fora ma na pert dl influs talian y di fostüs dla colo­nisaziun, che an sint fora ciamó incö. Trenker liëia sües fotografies cun anedotes y deura perspetives nöies sön la planificaziun dla cité, le lingaz, la cultura, la spëisa y la flora. Indlunch él da odëi framënc de colonisaziun. Chësc »cheder dla situaziun«, che mostra Asmara te döta süa belëza ciariada de storia, inviëia ince da ponsé sura te na manira critica n capitul important dla storia taliana.

Workshop por manajé le tëmp y le stress
Le Consëi de formaziun Badia inviëia a döes incuntades cun le dr. Aldo Menini, en mertesc ai 11 de novëmber dales 9:30 ales 17:30, y en mercui ai 12 de novëmber dales 9:00 ales 17:00, tla Ciasa J. B. Runcher a Badia
I n’á nia tëmp! Ci stress! Döes afermaziuns adorades sovënz tla vita da vigni de.
Mo sunse sigüsc da savëi co manajé le tëmp y le stress? Le fin de chësta incuntada formativa é de valorisé les situaziuns olache i aratun che chisc dui faturs sides n ostacul o cinamai n impedimënt por arjunje i obietifs. 
I partezi­panc ponsará do söla gestiun dl tëmp y imparará deplü tecniches por na ge­stiun efiziënta. Ai ciafará impulsc por ti dé les dërtes priorités ales cosses aladô dl’urgënza y dl’importanza. Iscriziun cina ai 5.11.2025 por mail a cf.badia@rolmail.net o por Whats­App al 338 4886447.

»Biodegradabl«
Cabaret ladin cun Pepi y Zenzo
Pepi Costner y Zenzo Obwegs in­viëia a so cabaret nü dal titul »Biodegradabl«, olache ai nes porta fora por n iade umoristich y mu­sical danter hotspots, Dolasila, turism sostenibl, iagri y rodes, campers y microplastica. Döt cun öna na gran domanda: é bëgn döt bio­degradabl?
Chisc é i termins dles rapre­sentaziuns: ai 12.11. tl salf dles manifestaziuns da La Val, ai 15.11. tla Ciasa J. B. Runcher a Badia, ai 16.11. tl salf dles manifestaziuns d’Al Plan, ai 19.11. tl gran salf dl Istitut Ladin a San Martin de Tor, ai 21.11. tl salf dles manife­staziuns a Corvara. 
Dagnora dales 20:00. L’entrada é debann y al n’ó ester degöna prenotaziun.

Michele Giro Jazz Trio
I Jëuni de Mujiga nvieia de cuer al terzo cunzert de chësta sajon, n juebia ai 6 de nuvëmber dala 20:00 tla Cësa di Cungresc a Urtijëi
L Jazz Trio Michele Giro, cun Mi­chele Giro al tlavir, Marco Stagni al violon y Roman Hinteregger ala bateria, prejënta si segondo album »My Standards« – na culezion de cumposizions urigineles te chëles che i elemënc dla mujiga da camera tlassica vën mescedei cun la armu­nies y ritms tipics dl jazz. 
Danterite abìnen nce nfluenzes dla mujiga latina ispiredes da Camilo e Do­minguez y nter­pre­tazions de cumposizions tlassiches, coche per ejëmpl l »Liebes­leid« di Fritz Kreisler.
La chertes de ntreda ie da giapé pra la cassa y danora tl ufize dla Lia per l Turism de Urtijëi.

»Total behindert«
En vëndres, ai 7 de novëmber dales 20.00, vëgnel tigní tl Barjënt dla Ciasa de Palsa la presentaziun dl liber de Mareike Sölch dal titul »Total behindert«
Te chësc se damana Sölch sce porsones cun na deja­bilité te nosta sozieté y te Südtirol á veramënter i me­demi dërc? Sce i un ar­junt le obietif de inclu­jiun o sce al vá ciamó debo­jëgn de mioramënc? Sunse lëdi da barieres? Co ciarera pa fora cun le dërt d’istru­ziun y cun les poscibilités de svilup personales? Co baiunse pa cun porsones cun dejabilité?
Por so liber »Total behin­dert« á Mareike Sölch baié cun deplü porsones cun dejabilité y se damana: é inclujiun ma na parora öta o sunse stá bugn da arjunje le fin metü dant?
L’auturia é nasciüda a Landshut te Paiern. Ara á fat le stüde de tecnica dl ton pro l’Université de mu­­siga a Viena. Cina al 2024 ára lauré sciöche reda­d­ëssa di programs pro Rai Südtirol, dantadöt pro­grams de atualité, y tl 2022 ára dé jö l’ejam de stat por jornalism. Sëgn virera a Linz y fej indô so laur da tecnica dl ton. La serada é por todësch.

»Evensong« tla Val Badia
En sabeda, ai 8 de novëmber 2025, dales 20:00, a La Val
En sabeda, ai 8 de novëmber 2025, dales 20:00, te dlijia da La Val vëgnel zelebré n »evensong«, na forma nöia de oraziuns da öspi ciantada y sonada deboriada da deplü cors de dlijia dla valada. Düc é bel inviá da cianté para o ascuté sö. A invié él la seziun Cors sot al’EPL-Ert por i Ladins.