La Usc di Ladins

Se cognoscer, se prejentèr, festejèr e se meter adum. Con chisc obietives l Istitut Cultural Ladin ge à dat alberch te Fascia tel ultim fin de setemèna a raprejentanc de la 12 mendranzes linguistiches sul tegnir de la Tèlia che é states recognosciudes da la Lege 482 del 1999.

Dut é peà via da l’idea de binèr adum chesta mendranzes linguistiches te na sociazion costituida ofizialmenter, idea nasciuda del 2024 canche, a 25 egn da l’aproazion de chela lege, la senatora Elena Testor aea endrezà n convegn a Roma per fèr l pont de la situazion. Te chela ocajion l era stat metù ju i fondamenc per la creazion de la Sociazion Articol 6, inom che fèsc referiment al articol de la Costituzion sul stravardament de la mendranzes linguistiches. La costituzion de chesta sociazion é stata portèda inant con gaissa da la diretora del ICL Sabrina Rasom che se à dat ju trop per chest adum col notèr Alessandro Franco.

Enstadì raprejentanc de la mendranzes germanofones, de cheles ozitana, francoprovenzala e franzousa, de cheles grika, croata e arbëreshë, sarda e catalana, furlana e slovena e ence ladins agordins é rué donca te Fascia. Na cincantina de persones se à binà en sabeda domesdì te la sala Heilmann del Museo e a ge dèr l benvegnù l é stat la presidenta del Istitut Tea Dezulian, che l'à rengrazià per l sostegn la Provinzia (prejenta la dirigenta del Servije mendranzes Elisabetta Sovilla) e la Region, portan ence l salut del assessor Luca Guglielmi. L procurador Edoardo Felicetti à rejonà de l'emportanza de lurèr adum per tegnir poz a la contaminazons del mond globalisà e la senatora Testor à fat referiment al ddl per ratifichèr la Chèrta Europeèna de la mendranzes, amò cet en Parlament, ma l'à jontà ite che l é giusta stat aproà chel per i raions da mont, che l deida ence i raions de mendranza che padesc per l spopolament.

Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.





 (Lucia Gross)