La Usc di Ladins

Tel meis de setember, apede che se averjer a la sajon da d’uton con duc si colores, la provinzia de Trent se enjigna a portèr dant sun sie tegnir na lingia de scomenzadives per sensibilisèr la comunanza sul tema del Alzheimer e su la demenzes. Duc chisc evenc vegn porté inant per endrez de la desvaliva comunanzes de val, e te Fascia del Comun General, tel chèder del Pian de trei egn per l svilup de na Comunanza amica de la persones con demenza.
L’atività te Fascia é peèda via ai 15 de setember, canche te l’APSP Ciasa de Paussa a Sèn Jan l é stat portà dant l liber »Memorie al presente. Anime bianche in controluce« con l intervent de l’autora Marica Grespan.
N auter apuntament l é en program chesta domenia ai 21 de setember, che l é apontin la Dì del Alzheimer. Tel Chino Marmolèda de Cianacei da les 20:30 per endrez del Servije sozio-assistenzièl – ‘Spazio Argento’ del Comun General de Fascia ensema con la sociazion Rencureme, vegn moscià l docufilm »Keys, Bags, Names, Words. Ricordi di demenza: storie di speranza«. L titol, che se pel traslatèr ‘Chief, Tasces, Inomes, Paroles’ l fèsc referiment a chela robes che duron duc i dis e che de solit l é anter la prumes a vegnir desmentièdes da la persones che padesc de demenza.
La Federazion Alzheimer talièna à rencurà la traduzion de chest docufilm e la lo à metù a la leta debant per poder l portèr dant al publich, ajache te chest filmat se pel veder la testimonianzes de persones con demenzes e de si familiares, ma ence i intervenc de spezialisć che rejona dal pont de veduda scientifich, sanitèr e politich a na vida neva e rica de prospetives per ne dir che, enceben che sie problemes, dificoltèdes, padiment e tema, na persona con demenza resta semper e dant da dut na persona, e ence do na diagnosa che fèsc cruzièr se pel fèr n muie per seghitèr a viver na vita piena, serena e degnitousa. La partezipazion é ledia, averta a duc e debant, e tel cors de la sera vegnarà portà dant la testimonianza de na familiara, Daniela Varesco, sozia de Rencureme.

Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.



 (CT/LG)