La Usc di Ladins

La campiona olimpica Federica Brignone l’à fat a saer en lunesc ai 2 de mèrz che no la tolarà più pèrt a autra garejèdes de Copa del Mond per via del mèl al jeneie e donca no la sarà te Fascia chesta fin de setemèna. Ma sarà Sofia Goggia che en sabeda passèda à vent l superG a Soldeu e la garejea ades per venjer la Copa de disciplina e Laura Pirovano che cor con la speranza zacan de n podie te Copa del Mond. Doi bona rejons per la trei garejèdes de Copa del Mond de schi de eles sun La VolatA dai 6 ai 8 de mèrz.
»Chisc trei dis de Copa del Mond te Fascia raprejenta l giust recognosciment del lurier fat te duc chisc egn, frut de la capazità de n sistem efizient che veit la colaborazion de istituzions, impiantisć, sozietà sportives e volontadives – à dit l president de l’ApT Fausto Lorenz. A la Olimpiades aon podù veder cotant che les pel fèr noscia atletes, su La VolatA podaron veder l top del schi de eles e per nos sarà na gran ocajion de visibilità.«
Anché, vender 6 de mèrz da les 11:30 l é la libera de recuperament de Crans Montana, doman sabeda 7 la seconda libera da les 10:45, da sera da les 6 te piaz de Sotegrava a Moena l é la premiazions e l’estrazion di numeres de gara. Domenia 8 gran finèl col superG da les 10:45.
L trofeo che ge vegnarà consegnà a la trei atletes sul podie é stat realisà dai studenc del Liceo artistich de la Scola Ladina.

Podede lejer dut su La Usc dai 6 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Monica Cigolla)