La Usc di Ladins

De segur dutes vo che lejede aede amò jià con la Barbie e cognoscede chesta picola popa che ti egn l’à interpretà passa 250 lurieres e la se à adatà ai mudamenc sozièi doventan na icona de la moda e n simbol global de emanzipazion feminina. 
Su la fegura de la Barbie e dut chel che la simbolisea te la sozietà se à dejout l spetacol dal titol »Miss SBarbie« endrezà dal Comun General de Fascia, la sociazions Circensema e Kino Cianacei en lunesc ai 9 de mèrz en ocajion de la giornèda internazionèla dedichèda a la eles.
Sun paladina l’atora Morgana Morandi e dutintorn en cerchie passa 100 Barbie, de duta la sorts e color, compagnes de jech, de imaginazion e de aventures. E dapò l é Franchina, l auto telecomanà, no ge pièsc le Barbie e l ge passa sora, e dapò ben segur no pel mencèr Ken… faus e uman.
L é stat n spetacol mingol punk, mingol politich e n muie energetich. N lurier sul corp con Morgana che jia, che muda guant, che interagesc col publich.

Podede lejer dut su La Usc dai 13 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Monica Cigolla)