La Usc di Ladins

Rua l’Aisciuda Ladina 2026. La festa del lengaz e de l’identità é sun usc e la met dant ence chest’outa n program rich. L argoment l é endodanef la toponomastica ladina ajache »un no l é da dèr, doi no l é da tor e trei vegn dal cher« e donca per la terza outa vegn metù al luster l’emportanza di inomes de nosc raion, testamonesc veiores de storia e comunanza. 
L Comun General de Fascia, l Istitut Cultural Ladin, la Scola Ladina e l’Union di Ladins de Fascia colaborea acioche duc posse endodanef cognoscer e durèr i inomes ladins di lesc de noscia bela val, percheche no vae perdù l leam col teritorie che nesc aves à abù dant da nos.
Ence chest an, per ge dèr l met a più jent che l é meso de tor pèrt a la sacotanta scomenzadives en program, l’Aisciuda Ladin vegn slarièda fora sun de più setemènes. A chesta vida duta la val e duta la comunanza les podarà esser protagonistes de chest event tant spetà. 
L’Aisciuda Ladina se aur en lunesc ai 4 de mé da les 20:30 te Sorastanza de la Scola Ladina a Sèn Jan con la prejentazion di ejic de la enrescida dal titol »Da la enrescida a la pratega educativa te più lengac« con la coordenadora del projet professora Paola Celentin. 
Ai 5 de mé l é l Dì de la bandiera ladina, vegn envià duc i sentadins a meter fora la bandiera ladina e l Comun General de Fascia darà fora sui social l video spezièl su la bandiera »Colores de noscia tera« con la partezipazion de jent de noscia comunanza.
En vender ai 8 de mé da les 16:30 aló dal Hotel Gran Mugon sun Tamion l’Union di Ladins de Fascia prejenta sie nef liber »Flora de Fascia« de Nives Iori e Alberto Chiocchetti en colaborazion con Marco Detomas.

Podede lejer dut su La Usc dai 24 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (MCI)