La Usc di Ladins

Bele dl 2018 unse scrit n iade t’La Usc de n gran proiet tl zënter d’Al Plan, che preodô – dit en cört – na reorganisaziun de döt l’areal danter le paiun, la scora de musiga, ciasa de Comun y Eurospar. N proiet che preodô da trá jö la sënta dla Crusc Blancia y ince la calonia, y fá sö costruziuns nöies en pert cun d’atres destinaziuns. Dedô él gnü plü chît incër le proiet, mo sëgn, dantadöt do les lîtes de Comun dl ann passé, á l’ombolt da sëgn y da laota Albert Palfrader defata brancé sö danü chësta gran opera, che podess ti dé n’atra cîra al zënter de paisc. Na pert sostanziala de chësc proiet é n gran garasc sot tera ite, che dess pormëte spo da tó demez i auti sura strada ia (danter calonia y ciasa dal Tabach). Zënza trá jö i frabicac, ne vára nia da realisé le garasc y intratan él gnü fat vari inant. La Crusc Blancia jará bonamënter ite chësc ann te süa sënta nöia tla strada Plazores, insciö che la sënta atuala pó gní trata jö, y ince la Ploania d’Al Plan se dá jö bele da plü tëmp cun le frabicat dla calonia.
Rodunt por la destinaziun dla calonia é na chestiun zënzater plü sensibla, deache la calonia é n frabicat cun chël che la jënt (che vá a dlijia) s’identifichëia deplü. Les calonies é gonot gnüdes fates sö cun le gran contribut dles spënores dla jënt. Madër che proi él tres demanco y tres plü calonies é ötes. Chëra d’Al Plan ne l’é nia ciamó, mo da "la smendrí" baion bele da tröc agn. Cun la chestiun se dá jö plü avisa n grup de laur dl Consëi d’aministraziun dla Ploania. Ai 13 d’aurí á le grup de laur informé plü avisa ince le Consëi de Cöra sön la proposta che an á sön mësa, i cosć che an jiss adincuntra y le plan por i finanzié. Tla sostanza ciafa le frabicat destinaziuns desvalies: sambëgn calonia, mo ince cuatiers por residënc, por chi che al é preodü contribuc provinziai. Döt adöm nen vára de n proiet de 3,8 miliuns de euro.

 (pablo)