La Usc di Ladins

En vëndres ai 24 d’aurí, él gnü dé l’alarm de medefüch incër misdé. Le medefüch s’á descedé daimpró al bosch sura Pasciantadú sö, olache la flama é piada ia dal pré y á lascé lové sö zacotan de niora de föm che ê da odëi da La Ila ca.
Tl pröm momënt é jüs en aziun i Stödafüch de Badia che á tut sö contant cun i verdabosch, por cherdé defata renforz canche an á odü tan aslöm che le füch se deslariâ fora a gauja dl vënt. Le prigo maiú ê che la flama rovass pro le bosch daimpró, cun tröp lignan sëch y mangé sö dal chefer. Le degré d’alarm s’á alzé da 1 a 3 y sön le post é defata rová adalerch düc i grups de stödafüch dl'Alta Badia, cun le grup da Al Plan.
Tres la zentrala él sté meso da organisé n joler, metü a desposiziun da na dita privata, tratan che le sach por trasporté l’ega é gnü metü a desposiziun dai Stödafüch d’Al Plan y deboriada él gnü trat sö na condüta dal’ega dala vijinanza de Castalta.
Sön le post é stá operatifs incër 150 stodafüch cina a n pü’ do les trëi domisdé, canche al é gnü constaté la fin dl maiú prigo. »Ara s’á traté de n intervënt valgamia zite, che á damané la colaboraziun danter deplü uniuns di stödafüch y l’intervënt dl joler por destodé te püch tëmp na maiú suraspersa tuta ite dala flama. An orô schivé che ara branciass ite le bosch«, cunta le comandant di Stödafüch de Badia Stefan Mangutsch.


Deplü da lí sön l'intervënt ciafëise tla ediziun nöia, che gnará publicada en jöbia ai 30 d'aurí!