La Usc di Ladins

L articol 11 de la Costituzion talièna disc che »La Tèlia descognosc la vera desche strument per tachèr la libertà de etres popui e desche vida per ressolver i contrasć internazionèi«. En cordanza con chest articol Emergency à envià via la campagna R1PUD1A. Ence l Grop Emergency de Fiem e Fascia se à dat ju per portèr inant chesta azion, che à jà abù l'adejion de passa 650 Comuns, 1500 scoles e 80.000 sentadins.
La proponeta se à slarià fora ence te noscia valèdes e l prum Comun a la tor dant l é stat chel de Juan, forin Fiem. Chiò l Consei de Comun jà ai 19 de mé l à à tout dant la domana e deliberà de dèr sia adejion e palesèr publicamenter sie sostegn a la campagna R1PUD1A.
Ai 10 de messèl l Grop Emergency de Fiem e Fascia ge à consegnà ofizialmenter ai raprejentanc del Comun n striscion con su scrit »Questa piazza ripudia la guerra«. La consegna é stata fata tel cors de na sera de gran relief, te na sala piena de jent, olache l era stat envià ence la infermiera Amanda Prezioso, che l'à lurà te desvalives lesc de vera e con Emergency l'à tout pèrt a trei miscions te l'Afghanistan e trei a Gaza, da olache la é vegnuda de retorn da pech.

Podede lejer dut su La Usc stampèda dai 24 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)