Le bun impede la tëma, San Micurá impede i malans

Data

22 de november 2026

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En ocajiun dla festa de Crist Re, recorda le vësco dla Diozeja de Balsan/Porsenú Ivo Muser le coraje de beat Josef Mayr–Nusser cuntra i totalisarisms, y critichëia les defilades di malans che mët sön na pert San Micurá
Crist Re é na festa de na importanza soziala y politica, sotrissëia le vësco Muser. Ara é gnüda metüda sö l’ann 1925 da papa Pio XI., ince sciöche sëgn cuntra ideologies totalitares. Le vësco scrí che degun stat, degun partí, degun leader politich o religius y degöna ideologia ne pó ghiré na olganza incondizionada. Gnanca la portignënza a n popul o a n grup linguistich ne pó gní metüda sura la dignité dla porsona. Gejú Crist ne stá nia por violënza y emarginaziun, mo por amur, verité, iustizia y misericordia.

Josef Mayr-Nusser: ti jí do ala cosciënza
Sciöche ejëmpl nominëia Muser le beat Josef Mayr-Nusser. Por gaujes de cosciënza âl neghé l’ann 1944 le joramënt sön Hitler y é mort l’ann 1945 sön tru cuntra le ciamp de conzentramënt a Dachau. Dl 2027 recordunse le diejim aniversar de süa beatificaziun. Da odëi la polarisaziun politica, les tendënzes nazionalistes y l’emarginaziun é so ejëmpl daspavënt atual. 
"I ne podun nia s’ausé ala violënza y ala logica de vera!", amonësc Muser cun l’odlada sön l’Ucraina. Ince tla Tera Santa ne röion nia pro la pesc. Fede cristiana mëss se desmostré dailó, olache al vëgn tizé tëma, emarginé porsones o aprijé violënza. I adorun na sozieté, na politica y n’economia che dëida la porsona y respetëia süa dignité 

San Micurá impede tëma y spavënt
La medema posiziun vëiga Muser te san Micurá. Al stá por la bunté: "San Micurá ne vëgn nia por fá tëma. Al vëgn por scinché ligrëza, por ti dé coraje ai mituns y por ti mostré che al paia la mëia da fá le bun." Le vësco rengraziëia dötes y düc chi che tëgn via chësta tradiziun. Tl medemo momënt critichëiel les manifestaziuns di malans, olache al mancia san Micurá y provochëia tëma, spavënt y violënza. Dantadöt sfilades di malans che döra edemes alalungia, dalunc dai 6 de dezëmber, perd le significat cristian. "Al ne pó nia ester che na tradiziun cristiana devëntes da paladina por spetacui che fej tëma, deperpo che le messaje dl sant vëgn sburlé do ia", scrí Muser.

Crist Re y san Micurá stá insciö ite por la medema dezijiun: cuntra violënza y emarginaziun, por umanité, cosciënza y coraje zivil. "Ala fin stá y davagna le bun", stlüj jö le vësco. 

(Diozeja Balsan/Porsenú)