La Usc di Ladins

La Usc La costion de la manutenzion di troes à empienì i sfoes per dis entriesc e l é stat tirà ite ence l'ApT: zachei à scrit che la spenc per portèr sa mont semper più jent. Che podede ne dir?

Nicolò Weiss Me n é fat marevea e me é ence mingol inirà, perché no l é vera, ajache noi sion do che fajon na politica deldut desferenta. Aon dezidù che de messal e aost no cognon più far nia che serve a portar su jent e jà da doi egn aon lascià ló de ge dar sostegn ai influencer. Con la zertificazion GSTC (Global Sustanaible Tourism Council, ndr) aon vardà de scomenzar a gestir i flusc: cognon passar da volum a valor e capir che se ti momenc de sajon più auta i numeres se smendra mingol, chest no cogn vegnir tout desché valch de negatif.

En cont de la manutenzion di troes l conseier Guglielmi à durà paroles fortes, tiran ca ence azidenc e morc...
Ei, anter le righe l é stat dit che la colpa la é de chi che rencura i viai, e gio sé che l obietif no l era tacar l'ApT, ma anter chi che rencura i viai sion ence noi. Jai 6 egn aon fat na convenzion per n projet de manutenzion di viai e ge aon dat inom »Sa mont«.

Che perveidela la convenzion?
La é stata sotescrita con la SAT zentrala da l'ApT ensema coi Comuns, le ASUC e l Comun General. Aon metù ensema zirca 140.000 euro de budget, i Comuns contribuesc col sistem proporzional desché per l Skibus. L é squadre che se cruzia de far manutenzion ordenara e sui viai chel che no é de la SAT ence de la segnaletica verticala. Aon n sistem de passaje de informazion sui besegnes e ogne grop dasc cont de olache l va e de chel che l à fat. La cordanza va fora chest an e do cognassane la renovar.

Podede lejer dut su La Usc stampèda dai 21 de aost da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Lucia Gross)