La Usc di Ladins

Sommelier sön pista tl’Alta Badia
Do le gran suzes di ultims inverns, vëgnel metü a jí ince chësc invern sön les pistes dl’Alta Badia l’iniziativa »Sommelier sön pista«, che valorisëia y fej conësce i mius vins de Südtirol
Indöt vëgnel metü a jí sis apuntamënc, che é söl program ai 13 de dezëmber, 17 de jená, 7 y 14 de forá, 7 de merz y ai 4 d’aurí. An s’incunta dales 13:45 por fá val’ pista tl raiun dai schi dl’Alta Badia, acompagná da n maester de schi, y spo storjon pro te döes üties, olache al gnará ciarcé i mius vins de Südtirol adöm cun n sommelier, che spligará les carateristiches di vins. Por tó pert mësson se scrí ite ti ofizi turistics dl’Alta Badia o online al prisc de 40,00€ a porsona.
Ai 24.01. y ai 21.03. él preodü l’ediziun speziala de »Sommelier sön pista«: pro la degustaziun de vin gnarál ince pité n menü de cater derzades, partí sö te döes üties dl raiun dl’Alta Badia. I partezipanc podará sintí sciöche le vin pó ti dé n valur implü ala derzada. Prenotaziuns al prisc de 80,00€ ti ofizi turistics dl’Alta Badia. L’iniziativa vëgn metüda a jí da Alta Badia Brand, en colabo­raziun cun le Consorz di Vins de Südtirol y l’Assoziaziun di Sommelier de Südtirol.

Mostra da Nadel »C + M + B« tl Museum Gherdëina
L Museum Gherdëina prejënta per l prim iede na pitura di Trëi Rëisc de n autere jit perdù
La mostra da Nadel tl Museum Gherdëina a Urtijëi ie chëst ann dedicheda ala iconografia di Trëi Rëiesc Casper, Melchior y Baltasar tla pitura y tla scultura. Coche opra particulera saral da udëi per l prim iede na pitura dl viac di Trëi Rëiesc dl 1600/10 che tucova n iede pra l vedl autere jit perdù dla dlieja da Sacun. Sëuraprò possen mo ti cialé a de plu opres ora dla dlieja da Sacun y d’autra figures y cumposizions dla cripl dal 16ejim al 20ejim secul.
Orar de giaurida: dal lunesc nchin ala sada, dala 14-18.
La mostra C+M+B resta da udëi nchin ai 7 de jené 2023.

Prejentazion de duta la scuadres dl Schi Club Gherdëina
L Schi Club Gherdëina nvieia ala prejentazion de duta si scuadres y si alenadëures, ai 15 de dezëmber dala 18:50 sun Plaza de Sant Antone a Urtijëi
N ucajion dla festa de giaurida di dis dla Copa dl Mond che scumëncia dala 18:30 y dla estrazion di numeri di atlec de fej pea l Super-G sun la Saslonch l di do, vën riesc do – dala 18:50 – prejentedes duta la scuadres, atlec:tes y alenadëures y sëuraprò sambën la 26ejima edizion dla brosciura nueva dl Schi Club Gherdëina.
L cudejel nuef
La sajon che ie dan porta vën prejenteda tl cudejel nuef, che ie urmei n liber tradiziunel cun bën 246 plates. La pert prinzipela dla brosciura ie sambën dedicheda ala scuadres, cun de bela fotografies de Werner Dejori.
Cun na drëta legrëza vëniel nce prejentà i atlec y la atletes che fej pert de na scuadra naziunela y la vëntes dla garejedes de nosc atlec y atletes cun a cë la majera sudesfazion dl Schi Club Gherdëina di ultimi ani: la bedaia de bront olimpica de Nadia Delago. L ne possa nia mancë la uneranzes che l Schi Club à pudù pië do tl ultimo ann: la Culana d’Or da pert dl CONI y la vënta dl titul de schi club campion dla Talia. Oradechël saràl da liejer mo de d’uni sort de argumënc che à da nfé cun l sport da d’inviern y l sarà truepa de bela fotografies.
Do la prejentazion unirà l liber dl Schi Club Gherdëina partì ora te duta la cëses de Gherdëina y chi che ne l giapëssa nia, possa gën jì a l tò tl ufize dl Schi Club Gherdëina te Sëlva, tla Cësa de Cultura.
Per duta la nfurmazions n con’ dl’atività, per cialé do i resultac y per plu fotografies d’uni sort pòssen jì sot a www.sciclubgardena.it

L Comun General ve envia a teater
Ultimes apuntamenc col grop Antermoia
La rassegna de teater ladin endrezèda dai Servijes Linguistics e Culturèi del Comun General de Fascia à abù enscin ades dassen n gran suzes. N muie de jent à empienì i teatres a ogne apuntament. Do I Bontemponi, La Mizacoles de Ciampedel e i Amisc del Teater de Moena a jir sun paladina sarà l grop de teater Antermoia.
I feruscoi comedianc rec da la regista Michela Marangoni met dant l spetacol dal titol »Centecincanta la gialina cianta« ispirà al test de Achille Campanile. I apuntamenc é en vender ai 16 de dezember da les 20:30 te La Gran Ciasa a Soraga e en domenia ai 18 de dezember da les 15:00 al PalaDolomites de Ciampestrin.
Recordon che a chi che tol pèrt a amancol 4 spetacoi, un per ogne compagnia, a la fin de la rassegna ge vegnarà sport n picol don. Siede duc envié, no mencià, ve godarede de gust!

»Oradò«: prejentazion dla CD nueva di Acajo
L cunzert cun prejentazion dla CD nueva

• 
•  

View the embedded image gallery online at:
https://www.lausc.it/manifestazions-y-evenc/21885-manifestazions-atuales-speziales#sigProId095c92d4e0

dal titul »Oradò« ie n duman sada ai 10 de dezëmber dala 20:00, tla sala nueva dla Cësa di Cungresc a Urtijëi
Sun la CD nueva iel 19 cianties scrites y ciantedes da duc i cumpunënc dla grupa Acajo.
De chëstes ie 17 cianties per ladin, una per tudësch dialet y una per franzëus. La paroles dla ciantia »La ie pa da rì« ië trates da na poejia de Rut Bernardi. La ntreda ie debant.

Cunzert dl’Urchestra Haydn
I Jëuni de Mujiga Gherdëina nvieia al cunzert dl’urchestra Haydn: n mierculdi ai 14.12. dala 20:00 tla Cësa di Cungresc a Urtijëi
L’urchestra sunerà sot ala bachëta de Giordano Bellincampi, Gina Gloria Tronel cianterà coche sopran. I pec sunei ie de Joseph Haydn: sinfunia n. 30 te Do Maggiore HOB. I:30 Alleluja; Wolfgang A. Mozart: Exsultate, Jubilate/Motette per sopran F-DUR K 158A; Ludwig Van Beethoven: Sinfonia n. 2 te Re Maggiore, OP. 36 L’urchestra Haydn nasc tl 1960 sun scumenciadiva di Chemuns y dla Provinzies de Bulsan y Trënt. Si repertoire va dal baroch nchin ai pec d’al didancuei y à bele pudù ncanté pra de plu festivals nternaziunei tl’Austria, ti Paejes Tudësc, tl Iapan, tla Talia, ti Stac Unic, tla Svizra y tl’Ungheria. La cher­­tes de ntreda ie da giapé n’ëura dan l cun­zert pra la cassa tla Cësa di Cungresc. Priesc singul: Granc:des: 18€; jëuni:es da 14 ai 26 ani: 12€. N possa nce resservé la chertes cherdan su pra la Lia dl Turism de Urtijëi al 0471 777600 o scrijan a ortisei@valgardena.it.

Albert Mellauner y »fiat lux«
Daurida dla mostra tla Hofburg a Porsenú cun la presentaziun de plü perts de »fiat lux«
En doman, sabeda ai 10 de dezëmber 2022, dales 11:00, sarál tla Hofburg a Porsenú la daurida dla mostra personala dl artist Albert Mellauner söl tema »ritms de co­rusc«.
Te chësta ocajiun gnarál ince porté dant dal cor moscedé »fiat lux« deplü perts fora dla composiziun de Ludwig Rindler, scrita d’aisciöda y rapresentada l’isté passé de plü iadi tla En­gels­burg a Neustift.

Festa de Santa Lizia a Lungiarü
En mertesc ai 13 de dezëmber vëgnel festejé a Lungiarü le patrozine de Santa Lizia. En chël de sarál ince n marcé da Nadé a bëgn dl cor de dlijia
Tl bel tëmp d’Advënt toma ite la festa de Santa Lizia, che vëgn invocada sciöche proteturia dla löm di edli y dla löm dla fede. La Ploania da Lungiarü festejëia chësta santa cun gran veneraziun y solenité y se conforta da saludé düc chi che gnará a fá patrozine cun süa comunité, en mertesc ai 13 de dezëmber. Dales 8:30 él la Corona, dales 9:00 la santa mëssa solëna en onú de Santa Lizia.
Do mëssa vëgnel organisé tl salf dla scora n marcé da Nadé, organisé y a bëgn dl cor de dlijia. Lapró sarál val’ da bëre y da sgolosé, da pert dla Uniun dles Ëres.