La Usc di Ladins

Forsci un dei aspec che n’à fat resté plu de stuch de chësta elezion, l é sté l inom: Leo XIV. Aldidancuoi no l é n inom che se usei a sentì, ma puoc menuti davò la benediscion del nuof Papa, me capité na situaizon plutost curiosa: è damané a na mëda damprò se podëve la daidé, ajache la bragláva dassën e mi pensáve che la stiebe mel. La m’à responù che la bragláva da la contentëza, ajache l eva l prum viade nte sua vita che la ruáva a Sán Piere ( l eva n desider che l’ava da duta la vita!), che l’ava volù clamé suo fiol co l inom Leo (e che duc i ava dit su per chësta sua dezijion!) e che l eva nasciù ai 14 de setember, l medemo dì de Papa Leo!

A chi che, come mi, i à pascion co la storia de la Gliejia, ven n mente l ultimo Papa Leo, l tredicejimo: mort del 1903 a 93 agn davò 25 agn de pontificat. Leo XIII l é recordé come “l Papa de le encicliche”: l n’à scrit 86! La plu famoja segur l é la Rerum Novarum: l prum docuement de la Gliejia che tol pojizion su cuestion soziale e l scomencé de chëla che deventarà la “Dottrina Sociale della Chiesa”. Nte sua vijion l Stat e la Gliejia ava da laoré deberiada per chël che auda l respet dei deric de duc, souraldut dei laoránc, de le ële e dei tosac (che nte chi agn vigniva sfrutei ntel mond del laour).

Ma l Cardinal Prevost, ntel dezide de se clamé Leo, da americán, po ester che l abe tout ispirazion da nnautra enciclica mportántiscima de Leo XIII, la LonginquaOceani, scrita proprio ai Vëscoi dei Stac Unis d’America. Nte chël document l Papa denunciáva l risćio per la Gliejia, che l se adaté ai prinzipi liberai, l assa metù n discuscion la strutura dotrinala de la Gliejia stëssa. L contestáva la nclinazion del clero americán à slesierì la religion, a esalté la scomenciadiva de un sol senza pensé a la eclesialité, a limé ju le verité plu dure del Vangel. La cuestion l eva ciara: la Gliejia mossa descore co la modernité, ma la no pò deventé n’agenzia soziala, na ONLUS, na ONG per se fè bela ai ogli del mond. L cuor de la Gliejia no l é la popolarité, ma testimonié e nunzié l Vangelo de Nost Signour e la fedelté a la Rivelazion.

Ncuoi, 130 agn davò chëla enciclica, fesc imprescion l’atualité de dut chëst: ncuoi, nte na sozieté ulache l prum valour l é l individualism, ulache la globalisazion porta a n relativism che no perveiga plu deguna verité, ulache ven conscideré demè chël che porta richëza e visibilité, co la tentazion (ence de la Gliejia!) de volei pleje a duc col pericol de mëte nte n canton l aspet spiritual e trascendental… avei n nuof Papa, che bele con suo inom vol fè lum su dute chëste cuestion, ne dà na gran speránza e fiduzia per l davignì.

da Roma, per La Usc di Ladins

Denni Dorigo