La Usc di Ladins

L fum, le ciampane, jent che sauta fora coran da vigni canton. Nte puoc menuti Plaza San Piere l’é folada de jent. Degugn oramei se la spetáva che da chëla cuarta votazion saute fora l nuof Papa: duc spetáva chëla davò, la cuinta! Son schicei un sun l auter, ntra l’emozion l ciaut e l bordel de la jent, máncia debota l fle. N joven seminarist, damprò mi, l é segur “se i à fat coscita n prescia, l é dessegur Parolin”; n berba de temp africán, davò mi su, l spera ntel prum Papa neigher; doi jovene che rua dal orient i à nte mán na fotografia del cardinal Tagle. I menuti no passa plu, davò le coltrine de le gran balconade de Sán Piere, no se veiga nia a muove… no resta che se giaude l sorogle che và a florì davò l cupolone de Michelangelo, che à tres na belëza da no crei. Ma puoch davò le set e n chert, se gioura l usc de la “Loggia delle Benedizioni” e l Cardinal Protodiacono Mamberti l pronunzia: "Annuntio vobis gaudium magnum; habemus Papam: Eminentissimum ac Reverendissimum Dominum, Dominum Robertum Franciscum Sanctae Romanae Ecclesiae Cardinalem Prevost qui sibi nomen imposuit Leonem Decimum Quartum”.

Davò l prum moment de entusiasm, la plaza resta de stuch: “Leo” n inom che aldidancuoi no s’à plu nte la orogla ma che recorda velch de gran, de mportánt! L cardinal Prevost, la maiou pert no l cugnësc… “l é n americán” zachei scraia, e la maiou pert storc l nes! Ie dighe a miei vejins che l é n agostiniano, che l é sté na vita n miscion n Perù, che l à n mus da valet: i me ciala e i no sà se i à da me creie o mánco. L eve vedù l di davánt n Basilica e m’ava plajù sua esprescion… puoce ore davánt, a marëna con Abraham, mio amico preve de la Nigeria, onva scherzé sul Papa americán… “l unico americán che assa podù deventé Papa” fossa sté proprio Prevost. 

Davò n cin, eco la crousc e delongo davò Papa Leo XIV, vestì da Papa! “La pesc la siebe con duc vos”…“chëst l é l prum salut del Signour resuscité, l bon Paster che à dé la vita per suo pastorëc” e nte n sciántiamen, la jent l à desmentié i sentimenc de sorpreja e forsci delujion, e l’é bele afezionada a suo nuof Paster: “Viva l Papa” duc scraia…!  Papa Leo damana de dì su n’Aemaria con dël: e chëst l é un dei momenc plu biei e sentus de duta la sëra. Nte n sclef rua la benediscion Urbi et Orbi, la mujica sona l inn, l Papa saluda e l se n và. L’emozion l’é tántolodio grana, da no capì gnánca ci che suzede dintourn via. 

Segur l é che a Gliejia a ndavò n Paster: l é n agostiniano, l é n miscionar, l à studié teologia a Chicago e Diritto Canonico al Angelicum de Roma e l cugnësc i gros problems che à la Gliejia aldidancuoi, ajache da doi agn l é a ce de na Prefetura (n Minister del Vaticano)… l descor talián, ingleisc, spagnol e franzeje! L à n mus da valet e da volei ben: spo, a Papa Leo: Pax, Vita et Salus Perpetua. 

Denni Dorigo, da Roma, per "La Usc di Ladins"