La Usc di Ladins

Da calche stemana nte Istitut cultural ladin Cesa de Jan a Col se pol ciatà na publicazion che daur nuove porte su chela che é stada la storia de Col. "Le Miniere del Fursil – I fornari del vescovo di Bressanone" l é l liber che l'apassionada de storia Silvia Grego l à metù auna darè pi de dies agn de inresside che fas lum su l'importanza dei for de Ciaurì e Valparola per la laurazion del far del Fursil. De pi su chest liber Silvia la n'à contà nte na intervista.

Silvia, da ce ela nassuda tua passion per l pais da Col?
Silvia Grego: Mi cugnesse l pais da Col da canche ave n an e mia famea la passava chilò l istà. I prim temp sievane nta La Vila, nte la cesa del maestro Tita Sommavilla e ilò, col passà dei agn, ai ciatà tanc de jovegn e jovene per stà auna, zogà e passà l temp. De chi agn ntel zentro del pais steva cotante famee e ogni an l eva na festa tornà cassù parceche respirave chela libertà che a stà ntel zentro de Mestre no respirave i auter mes dal an. L'amor per l pais l é restà incia canche son cressuda e ai metù man de passà cassù l istà con ma om e i fioi. On zafié a se comprà na cesa e cussì ncora ades vegnon su co zafion.

Elo chest particolar liam che t'à portà a te interessà a la storia de le miniere?
Bele ntel 1991 canche m'ave laureà in letere e filosofia con indiriz storich ave na mesa idea de scrive na tesi che descoresse de Col ma na part de la documentazion che podeva ester fondamental no la eva ncora a dispojizion dei archif e de la jent e alora ai mudà argoment. Po ntei agn la famea la s'à slargé e no m'ai pi dat ju per chesta mia passion. L'ocajion la eva stada nte le ferie de Nadal del 2009 a gauja del intervent che ave bù da fà darè che m'avé fat mal al janoge. Ilò ave bù da sta saldi ferma e miei fioi i eva jui a me ciò da lieje l liber "Il castello di Andraz e le miniere del Fursil" . L istà davant ave bù modo de vede per man de Sandro Pezzei l bel laor che l eva stà fat per recuperà le miniere per le vijite e chest argoment l ava tornà a me apassionà. Liejendo chest liber ai vedù che l eva cotante citaziogn de documenc e archif che ava material su le miniere e che sigur l eva ncora tanc de aspec che spetava de ester auzai fora.

De plu tla edizion stampeda de La Usc di Ladins o sun l e-paper a paiament www.lausc.it/e-paper