La Usc di Ladins

Dolomites Bike Day – 8. ediziun
I jus de Ciaulunch, Falzares y Alparora sará i protagonisć dl Dolomites Bike Day, che gnará metü a jí en sabeda ai 21 de jügn. Strades lëdies por les rodes y stlütes al trafich motorisé dales 8:30 ales 14:30
En chësc de vëgn les strades di trëi jus y i coliamënc anter i paisc de San Ciascian, La Ila, Corvara, Reba y La Pli de Fodom stlüc al trafich motorisé y resservá ai ziclisć, che pó se gode n de sön la roda en segurté. La roda é indöt 51 km lungia cun n deslivel de 1.370 m y an pó pié ia da ci paisc che an ó, cun ci sort de roda che an á plü ion. Le strades sön le percurs gnará stlütes por le trafich motorisé dales 8:30 ales 14:30. Al vëgn aconsié da fá la roda tl vers cuntra la ora, tan co da Corvara devers de Reba. Düc chi che vá ion cun la roda é dër bel inviá da tó pert a chësta manifestaziun, olache an n’á nia bria da se scrí ite y che ne dess nia ester na gara. Deplü informaziuns ciafon sön la plata internet: www.dolomitesbikeday.it

Soghé a golf tl’Alta Badia
La sajun dl golf á indô metü man. Le ciamp dl Golf Club Alta Badia é a desposiziun di apascioná, te na culissa spetacolara
Cun le 1. de jügn á le Golf Club Alta Badia indô daurí les portes. Por i apascioná de chësc sport él a despo­siziun le ciamp de Tranrüs a Corvara, che é senté ite a 1.700 metri, cun l’oca­­­jiun da soghé tla culissa speta­colara dl Sassongher y di crëps dolo­mitics. Le ciamp da Corvara se destënn sön n svilup de 2.730 metri, anter 9 büjes y n par complessif de 72. La »green fee« por 9 büjes costa 49,00€, chëra por 18 büjes 82,00€. Informaziuns plü menüdes sön les poscibilités da soghé y le material ciafon ala mail info@golfaltabadia.it, al numer de telefon 0471 836655 o sön www.golfaltabadia.it

Festival internazional de cors
Tla cornisc dl festival internazional de cors dl’Alta Val de Puster, él ince dui conzerc a Al Plan y un tl Ciastel de Tor a San Martin
Dai 11 ai 15 de jügn vëgnel indô tigní le »Alta Pusteria International Choir Festival«, cun chël che la Cooperativa Turistica Al Plan/San Martin colaborëia bele da n valgügn agn incá. Insciö sarál ince deplü conzerc te nüsc paisc. Incö vëndres ai 13 y en doman sabeda ai 14 de jügn, dales 21:00 ales 22:30, sarál dui conzerc te salf dles manifestaziuns d’Al Plan. La pröma sëra se lascia aldí danterater le Cor »Cantus Choceň« dala Re­publica Ceca, la »Schola Cantorum Bazzano« da Bologna, o le »Bibliocanto & NCP« da Roma. La secunda sëra cianta i cors »Gospel Soul« da Carpi, le »Gesangverein Konrodia« da Lustenau, le »Canto Libero« da Palermo y d’atri.
La sabeda dales 10:00 danmisdé él ince conzert itinerant tl Ciastel de Tor a San Mar­tin, acompagné dal cor »Isedici« da Vicenza y le cor »Thomas Tallis« da Noale (Aunejia).

Balé fej bon: lauratuere de bal
L Circolo - Lia Mostra d’Ert à l plajëi de nvië al lauratuere »Doi poejies de muvimënt« cun Anastasia Kostner y Riccardo Meneghini, n merdi ai 24 de juni dala 20:00, tla Cësa di Cungresc a Urtijëi
»Uni persona dassëssa balé, per duta si vita. Nia per vester n balarin, ma per balé«. Chësc zitat de Rudolf Nureyev, ulëssa sotrissé la mpurtanza dl bal y dl muvimënt: balé fej bon! L porta prò al svilup y mantenimënt de duta la musculatura y, coche uni sport, permëtel al corp de produjer endorfina, sustanza che porta a plu calma y miurea l umor.
Ntan la sëira fajeràn n workshop de improvi-sazion de bal modern cun coreografs y balarins prufesciunisć.
Sëuraprò saràl la puscibltà de pudëi cialé pro ala proes per na performance.
La sëira ie penseda per duc y dutes dai 16 ani insù y l ne n’ie nia debujën de esperienza.Tulëde pea guant da sté saurì y zeche da bever y passëde a fé pea!
Per plu nfurmazions: Circolo - Lia Mostra d’Ert, 377-5936350.