La Usc di Ladins

»Giro Giro Tondo« é le titul dl docu­mentar cört dl regist etnografich Paolo Vinati che é rové tla cernüda dl »Trento Film Festival« y é gnü tut sö tl program danter 130 films, rová adalerch da 38 naziuns. Por le pröm iade él sté da odëi en domënia ai 26 d’aurí a Trënt tl cheder dl festival cinematografich dediché ai raiuns da munt.

Paolo Vinati che vir y laora a La Val, vëgn pro da osservé la vita de valada cun sües tradiziuns, partico­larités y de sciöche la büsia turistica vëgn y vá. Le regist, etnologh spezia­lisé sön formes popolares de musiga, á na sensibilité particolara por re­conësce aspec identitars de na co­munité y de sciöche les carateristiches dl contest la condizionëia.
A dé dant le ritm de vita tla Val Badia, sciöche te d'atres perts dl Tirol dl Süd, él en gran pert le turism. Al é la forza economica plü sterscia por la valada y ala ti damana ai abitanc da s’adaté tresfora ales fases estremes che se müda jö te n decurs ziclich.

Tratan che la suraspersa liciorëia y i placac de marketing mostra le raiun turistich da süa plü bela pert, röia valgamia en desmentianza le laur invisibl dles porsones che con­tribuësc al funzionamënt de chësc sistem. »Giro Giro Tondo« é n omaje ai protagonisć de chësta pert, chëra plü ascognüda.


Liede deplü tla ediziun nöia de jöbia ai 30 d'aurí 2026!