La Usc di Ladins

Rocks & Art
N dialogh anter scienza e èrt tel Museo Geologich de la Dolomites de Pardac
Te la senta teritorièla del MUSE a Pardac na rassegna per descorir a na vida desvaliva la storia e i mudamenc del ambient e l raport anter natura e umanità.

• ai 23 de messèl: »Looking through the clouds«: mass media e raport anter ecologia e raprejentazion. N dialogh per descorir la relazions anter parbuda e ativism ambientèl. Con l artist Giacomo Segantini e Antonia Caola del MUSE.
• ai 6 de aost: »Tipografie immaginarie #6«. L efet de nosce azion sul ambient che aon entornvia e coche l’èrt registra i segnes de la relazions. Con l’artista Micol Grazioli e Lisa Angelini del MUSE.
• ai 20 de aost: »Accordatura sonora«. L son di giacees doventa ispirazion per la composizion musicala. Na ocajion per jit ite tel raport anter ambient, perzezion acustica e esprescion artistica. Con Sergio Maggioni e i musizis? del Conservatorie »F.A. Bomporti« de Trent e Riva del Garda.

Duta la scontrèdes les é de mercol da les 17:30, la partezipazion la é debant; maor informazions e prenotazion del post dal sit www.muse.it


GEOdi: n viac virtuèl tel temp
Descorir la geologia de la Dolomites e del Trentin l é n jech
L Museo Geologich de la Dolomites de Pardac, senta teritorièla del MUSE de Trent, envia duc, gregn e picoi dai 10 egn en su, a na espe­rienza fora de anter per descorir la m arevess de la geologia de la Dolomites e del Trentin te n viac virtuèl. Col visor per la realtà virtuèla metù a la leta, se pel viver l’esperienza de ruèr ite a fèr pèrt de n mond maraveous anter minerèi, crepes, minieres e scenaries che no se pel se fegurèr.
La neva scomenzadiva é stata metuda a jir de gra ai projec »GEOdi Minerali e Rocce«, che à abù l finanziament dal Fodo per la Cultura dal Minister de la Cultura, e »GEOdi Miniere« che à abù n finanziament da la Fon­dazion Caritro.
Atività su prenotazion: l biliet al museo comprà ensema con l’esperienza GEOdi per vegnir durà per na setemèna e se pel jir ite più outes per na neva esperienza o na vijita vidèda paan demò l’atività cernuda.
Info su www.muse.it


La Bira Te Fascia
L Festival de la Bira artejanèla da mont a Cianacei al Fassa Park te strèda del Ciuch 17, dai 18 ai 20 de messèl
Da 13 egn La Bira tre Fascia porta te val picoi produtores che sporc ence cultura, tradizion e identità: dai 18 ai 20 de messèl sion a Cianacei al Fassa Park te strèda del Ciuch 17.
Passa 50 bires artejanèles de 6 produtores da Trentin, Südtirol, Sardegna, Toscana, Marche e Piemont e amò magnadiva a km 0, Masterclass, laboratories per bec, Show Cooking e l concors ‘Na bira per l istà’.
Vender 18 e sabeda 19 avert da les 16:00 a les 24:00. Domesdì laboratories ‘MaltAttak’ e Masterclass su prenotazion. Da les 21:00 musega live e spetacoi: vender l ciantautor Luca Annoni e sabeda la Chernoband+Fade
Domenia 20 avert da les 12:00 a les 24:00. Domesdì laboratories Tutti i frutti+1, Malt Attack e Masterclass; da les 18:00 Show Cooking con Virgy’s Kitchen; da les 19:30 premiazion del concors ‘Na bira per l istà’ e da les 21:00 l folk rock di Wine Barrels.
Info www.labiratefascia.it; wa 329 9159877; prenotazion laboratories e masterclass: labiratefascia@gmail.com


Festa da d’isté te Ciasa de Palsa
Döta la comunité é bel inviada da gní a fá festa, ai 20 de messé. Söl program la mëssa deboriada y dedô aperitif cun musiga
En domënia ai 20 de messé vëgnel tigní te Ciasa de Palsa Ojöp Frëina­demetz a San Martin la tra­dizio­nala Festa da d’isté. Le de mët man dales 9:30 cun la santa mëssa dla comu­nité, ciantada dal grup de mitans »CorUsc« da San Martin de Tor. 
Dedô sarál n aperitif cun intra­tignimënt musical cina da misdé. Döta la comunité, pici y gragn, é bel inviada da tó pert. Al nes fajess plajëi da podëi ves saludé.


»Na cascada de saus« a Calfosch
I pra a Plan de Piagn, püch dalunc dales cascades de Pisciadú, i fajará da cornisc ala manifestaziun gastronomica ai 22 de messé, dedicada en chësc ann al’ega
En mertesc ai 22 de messé vëgnel metü a jí la manifestaziun gastronomica »Na cascada de saus«, a Calfosch pro le Plan de Piagn. La tematica de chësta ediziun é l’ega, che an pó aldí tla natöra, che sará n ingrediënt che caraterisëia les spezialités gastronomiches. Dl’ega podarán indere ince imparé val’ deplü cun la geologa. Por l’ocajiun gnarál pité spe­zialités gastronomiches tradizionales sciöche tutres y fortaies, bales da polënta y ciajó, pasta cun smalz y forela, deplü sorts de panins y liagnes mo ince duciaries sciöche strudl y buhtli, arjigná ca da strotöres y uniuns dl post. Na cascada de saus mët man dales 11:30 y döra cina ales 17:00, y gnará abelida dales melodies di grups »!nes« y »Thermos«. Sce al foss bur’ tëmp, vëgn la manifestaziun spostada ai 24 de messé. Por arjunje Plan de Piagn pón jí da Corvara o da Calfosch demez (dal Bistrot dla scora de schi) do le tru numer 28, devers dles cascades de Pisciadú.


Ilominaziun dla Tridentina
Ai

• 
•  

View the embedded image gallery online at:
https://www.lausc.it/manifestazions-y-evenc/29956-manifestazions-atuales-speziales#sigProId1815222f70

25 de messé vëgnel ilominé la via ferata Tridentina a Calfosch. Les melodies dla Müjiga Calfosch-Corvara fajará da cornisc
Löms y corusc sarál da odëi sö por la Via Ferata Tridentina la sëra dl vëndres ai 25 de messé. La via ferata plü conesciüda dles Dolomites, che vá dal Ju de Frara cina sön Pisciadú, gnará ilominada da n valgügn mëmbri dl grup de alpinisć »Croderes«. La Tridentina é gnüda inaugurada l’ann 1960 da Germano Kostner, che â metü en pe le proiet de na via ferata sön la Tor Exner, por rové diretamënter pro la ütia Pisciadú. Tl 1967 ésera spo gnüda rovada, do che al é gnü metü sö cordes de metal y rampins cina söinsom y che al é gnü fat sö le punt, simbol dla via ferata. Deperpo che la via ferata vëgn ilominada sarál la Müjiga Calfosch-Corvara che tëgn so conzert sön plaza de dlijia a Cal­fosch, plü avisa dales 21:15 inant. I Stüdafüch da Calfosch dará fora da mangé y da bëre. Sce al foss bur’ tëmp, gnarál anulé l’ilominaziun y le conzert gnará tigní tl salf dles manife­staziuns a Corvara.


Incuntades leterares cun auturs taliagn
Dai 25 de messé fina ai 14 d’agost él indô les incuntades cun l’autur »Un libro, un rifugio«, olache al vëgn presenté libri sön temesc de atualité y nia ma
L’Alta Badia mët a jí ince en chësc isté na seria de apuntamënc cun auturs taliagn. Dai 25 de messé cina ai 14 d’agost vëgnel organisé a Corvara deplü incuntades cun personaji dla leteratöra taliana. Öna na presentaziun gnará ince tignida ala­leria, sön Boé.
Les incuntades trata temesc d’atualité, de storia, d’identité y de record. N valgügn apuntamënc gnará abelis da musiga.
9 apuntamënc
Chisc é i scriturs che an podará incunté chësc isté:
25.07. dales 18.00: »Kate e la maledizione dei Galles«, de Antonio Caprarica
30.07. dales 18:00: »Le querce non fanno limoni«, de Chiara Francini
01.08. dales 18:00: »Di madre in figlia«, de Concita De Gregorio
02.08. dales 21:00: »Frontiera. Perché sarà un nuovo secolo americano«, de Francesco Costa
06.08. dales 21:00: »Cara Giulia. Quello che ho imparato da mia figlia«, de Gino Cecchettin
07.08. dales 18:00: »Socrate, Agata e il futuro. L’arte di invecchiare con filosofia«, de Beppe Severgnini
10.08. dales 14:30: »Il pappagallo muto«, de Maurizio de Giovanni, sön Boé
12.08. dales 18:00: »Senza giri di parole. La verità sulle sfide economiche e sociali del nostro futuro«, de Carlo Cottarelli
14.08. dales 18:00: »I miei libri esclamativi«, de Ambra Angiolini.
Les incuntades vëgn tignides tl salf dles ma­nifestaziuns a Corvara, adinfora de chëra di 10 de agost, che gnará metüda a jí alaleria sön Boé, alaleria. Deplü informaziuns sura la manifestaziun ciafon sot ala plata internet www.altabadia.org


Na munt de emoziuns
Tl’Alta Badia dui apuntamënc cun alpinisć y sportifs conesciüs a livel internazional, che cunta de sües esperiënzes tles munts
Le pröm apuntamënt vëgn tigní en lönesc ai 21 de messé tl salf dles manifestaziuns a La Ila cun Silvio Mondinelli. L’alpinist conesciü cun le surainom »Gnaro« á arjunt la piza de düc 14 i otmile, zënza anuzé l’ossigen. Lapró al ince metü a jí deplü proiec umanitars, suradöt tl Nepal, olache al á fat sö scores y daidé le svilup dla comunité locala. Al nes cuntará de sües esperiënzes de vita. Le secundo apuntamënt sará cun l’ex atlet paralimpich dla scuadra taliana Andrea Lanfri. Al é le pröm pluri – amputé che á arjunt en autonomia la piza dl Everest. Do na maratia cun 28 agn, ti él gnü taié ia les iames y n per de dëic dles mans, mo al ne l’á nia dada sö. So messaje de renasciüda y de determinaziun sará la tematica dl’incuntada ai 25 d’agost, tl salf dles manifestaziuns a Corvara. Trames les incuntades é dales 21:15, por talian.


Musiga ladina te plaza
En gaujiun dla kermesse culinara dles uniuns »La Pli te Taí«, en vëndres ai 1. de agost 2025, dales 18:00 ales 24:00, alaleria
Do cater agn de palsa, vëgn indô düc inviá al conzert »Musiga ladina te plaza«, organisé en chësc iade dal’EPL-Ert por i Ladins tla cornisc dl proiet cultural y sozial PNRR »La Pl, n tesur da descurí«. La manifestaziun mët man dales 18:00 cun »La Pli te Taí« y intratenimënt cun le grup musical acustich d’Al Plan »Da Piz a Ciantun«. Inant jarara dales 20:30 cun le conzert sön paiun di ciantauturs y grups pop-rock-folk ladins: Idemorvëia, Laura Willeit y Hubert Dorigatti, Hubert y Lucia, Ethnique Techniques, Anita Obwegs, The Zanzis (Gherdëna) y Alexander Dal Plan cun band. Da aldí saral en chësc ann esclusivamënter cianties originales ladines, en gran pert scrites dai ciantauturs y grups instësc.


Curs de ilustraziun
Cun l’artista Silvia Baccanti. Davert a dötes y düc dai 14 agn insö, numer stlüt de partezipaziun
Te sál bel da dessigné y/o da cunté stories? Aste interes da descurí le monn di libri da n punt de odüda nü? Ne saste gonot nia co mëte man n dessëgn, mo al te savess bel da imparé? Sce t’as respognü de sce almanco un n iade, spo é chësc le dër curs por te! L’artista y ilustradëssa Silvia Baccanti da Corvara tignará le curs por döes finsdledema, ai 26-27 de messé, y ai 2-3 d’agost 2025, sabeda y domënia, dales 13:00 ales 18:00 tl local di cursc dl Istitut Ladin Mi­curá de Rü a San Martin de Tor. Prisc: 70,00 Euro (material lapró). Organisaziun: EPL–Ert por i Ladins, informaziuns y pre­notaziuns al 349 6077942.


Curs de pitöra alaleria
Cun l’artista Jutta Valentini, dai 28 de messé al 1. de agost dales 14:00 ales 18:00. Por interessá y interessades dai 14 insö
Le curs organisé dal’uniun EPL–Ert por i Ladins in­viëia i partezipanc y les par­tezipantes da depënje na odüda alaleria, olache al vëgn naota analisé ejëmpli de laurs. Do che an á chirí fora n bel post da depënje, se dán jö cun le stüde dles destanzes, le valur di corusc y l’atmosfera dl momënt. 
Prisc de partezipaziun: 50,00 euro. Post: local di cursc tl Istitut Ladin Micurá de Rü, infos y prenotaziuns al 346 8037304, e-mail: jutta@valentini.cc


»Enßle y Lamprecht« a La Val
Festival Badiamusica: le duo Anne Suse Enßle y Philipp Lamprecht é da aldí ai 27 de messé: dales 19:00 te dlijia de Santa Berbura y dales 20:30 tla »Ostaria vedla«
Le ciampaní ciamó mantigní dla dlijia vedla (nominada tl 1382) cun la calonia da inlaota y la dlijia de Santa Berbura, che é deventada le punt de referimënt de La Val, abelësc la fraziun plü vedla dl paisc. Sëgn s’á ince l’ostaria sö Dlijia vedla – la »Ostaria vedla 1445« descedé da so sonn lunch. 
Cun la musiga fora dl tëmp dles origines de chësc post storich, portada dant dal duo Enßle-Lamprecht, pón vire danü les saus y les tradiziuns de chël tëmp. En domënia ai 27 de messé dales 19:00 portai dant tla dlijia de Santa Berbura la »Nikodemuspassion«; dedô, ales 20:30, sarál da aldí tla »Ostaria vedla« deplü toc sot al titul »Vinum et amor«.


Sëra de musiga, imajes y poesia
Le festival Badiamusica pîta en lönesc ai 28 de messé dales 21:00 musiga di »Unknown Brass«, fotografies de Sepp Hackhofer y rezitaziuns de Toni Taschler, te Ciasa dla cultura a La Ila
Sot al titul »The View Beyond« gnarál pité na serada cun com­binaziun danter musiga, imajes y poesia, che cheriëia n caleidoscop di sënsc, na vijiun »sura la realté«. Cun le ritm dles sajuns vëgnel descedé emoziuns particolares. An pó aldí, odëi y aziché l’incan­tejim y la belëza dles pices cosses y di gragn contesć. 
Le proiet dl grup »Unknown Brass«, dl fotograf dla natöra Sepp Hackhofer y dl rezitadú Toni Taschler devënta na esperiënza si­nestetica, che ti pormët al publich na osservaziun contem­plativa y na cosciënza sota.


»Uma Tera« cun le duo Gota
Jan y Katia Moling se lascia aldí tla cornisc dl festival Badiamusica, en mercui ai 30 de messé dales 21:00, te salf dles manifestaziuns a La Val
Le duo »Gota« é metü adöm da Jan Moling (handpan, percusciun y didgeridoo) y Katia Moling (viola, vidora y usc). Tl conzert »Uma Tera« a La Val nes condüjai te n iade musical fora por le monn. Cianties originales dl duo se moscëda cun cianties popolares de d’atres popolaziuns, aranjades y arichides cun tesć por ladin. I sonns sudamericans, celtics y balcanics se incrujëia insciö cun la tradiziun ladina y ti dá vita a n dialogh cultural afascinant, che zelebrëia la richëza dla musiga popolara tres interpretaziuns y conesciuns nöies.