La Usc di Ladins

Aldò de la normativa provinzièla, l Sorastant de la Scola Ladina de Fascia vegn nominà con n concors resservà; sia encèria à regnèda 5 egn e la pel vegnir renovèda demò n'outa. L professor Federico Corradini, che aea vent l concors d'istà del 2021, do 5 egn a cef de duta la Scola Ladina l à cernù per rejons personèles de no jir inant per i etres 5 egn e l ge à fat a saer per temp amò tel meis de jené passà sia dezijion a la Provinzia, che enstadì l'à manà fora l avis de concors per l nef Sorastant.
L concors, aproà da la Jonta provinzièla e publicà sul portal de la scola trentina Vivoscuola ai 6 de mèrz, l é pervedù per titoi e doi proes a ousc. La domanes per tor pèrt cogn vegnir fates online sul medemo portal (sezion concorsc) dant che vae fora trenta dis da la publicazion sul Boletin ofizial de la Region Trentin Sudtirol.

Su La Usc dai 13 de mèrz vegn scrit en curt de la normatives spezièles per La Scola Ladina de Fascia e per la fegura del Sorastant, con n apel de l'Union di Ladins de Fascia acioche la peresones con competenzes che cognosc e ge tegn a nosc lengaz e noscia cultura les se mete a la leta per chesta encèries emportantes per duta la comunanza.

Podede troèr La Usc te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)