La Usc di Ladins

Ueves da Pasca per n bon fin
La AIL-assoziazion taliana contra la leucemia - mët a jì n vënderdi ai 20 de merz sun Pitla Plaza de S. Antone la azion di ueves da Pasca
La azion che vën metuda a jì bele da plu ani incà, à l fin de judé y dé n cun­­tribut ala nrescida n con’ di tumo­res dl sanch (leucemies, linfoms y mieloms). Sun Pitla Plaza de Sant Antone a Urtijëii puderàn n vënderdi ai 20 de merz ntan dut l di cumpré de biei ueves de ciculata. 
N pensier speziel ti va a Cristina Moroder Gasser che ova ulù che la ma­nifestazion unisse fata nce a Urtijëi - purton inant si sëmi! I ulenteres dl’AIL rengrazia bele danora.

Nadia y Klaus Rungger tla Galerie 90
L dessëni anconta la poejia – giaurida ai 21 de merz dala 18:30
Tla mostra »Zeichnung trifft Poesie/Il disegno incontra la poesia« tla galeria Galerie 90 a Mühlbach prejënta Klaus Rungger dessënies nueves daujin a poejies de Nadia Rungger. 
La giaurida dla mostra ie n sada ai 21 de merz dala 18:30. Do n salut de Alex Pergher saràl da audì la ntroduzion de Edith Strobl y la letura de Nadia Rungger. Mujiga: L.A.N. Sound Connection. La mostra ie tl segondo partimënt dla cësa Wolken­steinerhaus tla streda Katha­rina Lanz 90 y ie da udëi dai 21.03. ai 25.04.2026.

Teater »Der WahnSinn - Ein Kopfkino«
La lia Teater Urtijëi nvieia de cuer a si reprejentazions dl pez da rì
L se trata de n pez da rì scrit nstës dal reghisser Patrick Perathoner, che à tëut ispirazion dala cumedia de Paolo Genovese.
»Wahnsinn - Ein Kopfkino« conta dla prima ancuntenda danter Lara y Peter, ntan chëla che l ne vën nia mé mustrà coche la va danter ëi doi, ma nce cie che l suzed tla mëntes di doi prutagunisć. La persunaliteies desfrëntes, si tëmes y mpulsc vën vives y se mostra sun paladina... co jirà pa a finé la sëira danter Lara y Peter? Muessen pa for se dì dut o iel pa datrai mpo miec se tenì vel’ pensier mé per sé nstës?
L pez tla rujeneda tudëscia unirà purtà dant l prim iede ai 18 de merz dala 20:00 tla Cësa di Crungresc a Urtijëi. Daldò saràl mo cater reprejentazions, for tla Cësa di Cungresc: ai 20.03. dala 20.00, ai 22.03. dala 18.00, ai 24.03. dala 20.00 y ai 27.03. dala 20.00. 
Chertes danora giàpen online sot al link theatergroeden.com/tickets o cherdan su l numer 389 6767333.

RETROSPEKTIVE – Klemens Piccolruaz
Tl self dla mostres dla Lia Mostra d’Ert vëniel metù ora lëures de Klemens Piccolruaz. La giaurida ie n juebia ai 19 de merz dala 18:00
Klemens Piccolruaz (*29. auril 1939) ie n scultëur che viv y lëura sa Sacun/Urtijëi. Si fasa criativa y artistica plu ntensiva scumëncia canche l ie n pension. Te chësc tëmp se dedichéiel ala creazion liedia y scumëncia a lauré cun materiai naturei che l abina, coche ravises y sasc. L ziplé tl sas al mparà da sëul, purvan ora sortes de sasc desfrënc de nosta cuntreda. Coche persona omla, lieda ala natura y nce mpue spevia, lëura Klemens Piccolruaz te n dialogh chiet cun l paesaje, l sas y l lën. Ora de obiec abinei svilupéiel cun gran pazienza, esperienza y ntuizion scultures chietes ma stersces che spidlea l respet dan l material y si uriginn.
La mostra resterà da udëi nchin ai 11 de auril ntan i orares de giaurida: dal merdi nchin la dumënia, 16:00-19:00 y de sada y dumënia nce danmesdì, 10:00-12:00. De lunesc iel stlut.

Sellaronda Skimarathon
En vëndres ai 20 de merz vëgnel desfiré la 32. ediziun dla Sellaronda Skimarathon, che pëia ia chësc ann da Corvara
La Sellaronda Skimarathon, la gara interna­zionala de schialpinism de nöt, é rovada a süa 32. ediziun. En chësc ann pëia ia i con­corënc le vëndres ai 20 de merz dales 18:00 da Corvara demez, plü avisa jödapé dla pista Boé. Da Corvara vái spo cuntra Reba, Cianacëi, Sëlva y zoruch a Corvara sura i cater jus dolomitics incër le grup dl Sela, por n percurs de 42 km y 2.700 m de deslivel. I pröms atlec rovará al travert a Corvara incër les 21:00 y chiló podará i spetadus incorajé i partezipanc ti ultims metri de gara. Al tolará pert scuadres a copies de ëi o ëres da deplü naziuns, por n total de 550 copies. La premiaziun ofiziala gnará tignida dales 23:30 tla hala dl tennis a Corvara, olache al vëgn metü a jí le pasta party dales 22:00 inant, davert a düc. Deplü informaziuns sot a www.sellaronda.it

Altonn tl’Alaska
Le Fotoclub Val Badia organisëia en jöbia ai 19 de merz dales 20:30 na proieziun de fotografies cun Jep Taibon, tl gran salf dl Istitut Ladin a San Martin
Canche al vëgn altonn tl’Alaska, se vist les gran planüdes por cört tëmp n guant de corusc, ghel y scür cöce, le guant dl »Indian Summer«. Te chisc dis se müda la natöra da de a de y se manifestëia te döta süa maesté, de­nanche al vëgnes l’invern frëit y lunch. Te n chît demorvëia, dalunc dala zivili­saziun, pón amiré la belëza dla tundra artica y la pröma nëi sön les pizes plü altes dl »Alaska Range«. Impresciun fej i gragn dlacias, dantadöt tl raiun dles »Chugach Mountains«, olache an ti röia saurí dër daimpró.
Düc é dër bel inviá da gní a partí chësc iade »to the last frontier«... sön l’ultim confin dla zivilisaziun.

Curs da balé a La Ila
Dai 17 de merz fina ai 15 de ma pón imparé da balé bai tradizionai y nia ma
Le Consëi de formaziun Badia mët a jí n curs da balé cun Günther Hellweger. Al vëgn insigné da balé deplü sorts de bai, sciöche polca, valzer, boarisch, discofox...
Le curs vëgn tigní vigni mertesc, dai 17 de merz cina ai 5 de ma, tl’aula magna dla scora mesana da La Ila. Dales 19:00 por prinzipianc, dales 20:00 por progredis, dales 21:00 salsa bachata. Les pre­notaziuns vëgn tutes sö al 340 2209827 (scrí sön Whatsapp o cherdé sö do les 16:00). Le cost dl curs é de 150,00€ a porsona.

Dolomiti Ski Jazz: ultimes apuntamenc
La 30^ edizion del emportant festival de musega se sera su con doi conzerc de valuta, insnet a Pardac e doman a Moena: te Navalge sarà l chitarist lejendarie Franck Gambale con etres musizisć
Va inant con gran suzes l Dolomiti Ski Jazz, event endrezà dal diretor artistich Enrico Tommasini col sostegn de APT de Fascia e de Fiem, Trentino Marketing e Consorzies di Impianc portamont, e l responsabol tecnich Marco Mattia.
I ultimes apuntamenc del rich program de conzerc con musizisć de nonzech internazionèl:
insnet vender ai 13 da les 21:00 te teater de Pardac la neva steila del jazz Kinga Glyk;
doman sabeda ai da les 12:00 sun Belamont al Chalet 44: Mozes Rosenberg Trio e da les 21:00 al teater Navalge de Moena l straordenèr conzert de Frank Gambale All Stars.
en domenia ai 15 da les 12:00 a la Baita Rodela 2222: Mozes Rosenberg Trio e semper da les 12:00 al Sporting sun Cermis Evi Mair Olympus Band.
Maor informazions sui sic de l’ApT de Fascia e de Fiem.