La Usc di Ladins

Curs de teater
Cun la regista y pedagoga Erika Castlunger tla Ciasa dla Cultura da La Ila 
L’Uniun Teater La Ila mët a jí n curs de teater por mitans y mituns cun Erika Castlunger tla Ciasa dla Cultura da La Ila vigni vëndres dai 26 de setëmber inant por 10 indöt iadi: - dales 14:30 ales 15:30 por la 3. y 4. classa dla scora elemen­tara, - dales 16:00 ales 17:30 por la 5. classa dla scora elementara y por la 1., 2. y 3. classa dla scora mesana. Le cost é de 30 Euro. Informaziuns y iscriziuns pro Erika 339 6288847.

I se tolun tëmp, ma nos dui!
Strategies por vire na bona vita de copia. Serada cun Giuliana Franchini y Pino Maiolo, psicologs y psicoterapeuc, ai 3 de otober tl Salf di stödafüch y workshop ai 4 de otober
La vita tla copia é öna dles perts plü importantes de nosta vita, mo co ciara pa fora na bona vita de copia? Y co se müda pa les relaziuns söla basa de esperiënzes personales, di cambiamënc dla sozieté, dla digitalisaziuns? Esistel tecniches y strategies por mioré la vita de n per? Ci savun pa al­de­daincö dl amur? Y chësc se müda? Savunse da da ascuté sö y comuniché? Chëstes sará les domandes che dess ciaré lerch tratan chësta sëra adöm ai dui esperc, che é n per ince tla vita.
Y por aprofondí ciamó deplü la tematica, sarál la sabeda dan­misdé, ai 4 de otober n work­shop cun chisc tems: – se cone­sciunse? I descuriun magari valch che i ne savun nia – comuniché ince zënza parores, mo se ascu­tunse sö? – co se dessenunse pa? Po­dunse imparé da strité damí zënza se desdrüje sciöche per? – y por somié inant, magari soms debo­riada! I se tolun tëmp, ma por nos dui! La serada ai 3 de otober mët man dales 19:30 por düc, y le workshop la sabeda sará dales 8:30 ales 13:00 sön preno­taziun al 0474 52 45 52. Organi­saziun: Comité de Raiun Val Ba­dia. Düc é de cör bel inviá.

Borjé i polorins
Sciöche vigni ann tl pröm dl altonn, gnaral desfiré la borjada di polorins en jöbia ai 25 de setëmber 2025 dales 12:00 inant a La Ila
Da do la vera incá vëgnel or­ganisé vigni ann ala fin dl isté sön le lüch da Boscdaplan a La Ila la borjada di polorins dai 6 mëisc insö. En jöbia ai 25 de setëmber sarara indô tan inant por i polorins Haflinger y Noricher dla Val Badia.
Ala fin dl isté vëgn i polorins che é nasciüs da d’aisciöda borjá y portá ite tl liber gene­alogich. La borjada di polorins, sciöche al ti vëgn dit tl jargon di zidladus di ciavai, vëgn da­gnora fata a La Ila, sön le lüch da Boscdaplan, olache al sará ince picia aorela cörta cun spëisa y boanda.

»Der alte Mann und der Hase«
Na conversaziun sinziera che dá coraje sön la vita y la mort. Presen­taziun dl liber de Berend Feddersen y dla rëi de cures paliatives dl’Aziënda sanitara da Bornech ai 26 de setëmber 2025 te Ciasa de Palsa a San Martin de Tor
Che tol pa la dezijiun canch’i ne pó nia plü le fá? Le prof. dr. Berend Feddersen n’é nia ma n espert renomé y impegné tl ciamp dla medejina palliativa y neurologh, mo ince n ilustradú de talënt. Te chësc liber baia n conicio y n berba di ultims momënc dla vita. Domandes ries sciöche: che tol pa la dezijiun canch’i ne pó nia plü iö tó dezijiun? ciafa na resposta te na manira ligherzina mo concreta. Insciö pón afronté les chestiuns importantes che mëss gní stlarides tl testamënt biologich (tod. »Patientenverfügung«) y tles mosöres de cura y assistënza sanitara y soziala cun sensibilité, sapiënza y tl medemo tëmp cun na lisirëza demorvëia. I ves aspetun por na serada interativa y plëna de umor sön n argomënt che reverda düc nos, mo che ne mëss nia nes turbé.
En chësta ocajiun gnarál ince presenté la rëi de cures paliatives dl’Aziënda sanitara da Bornech adöm al personal dl Raiun sanitar Val Badia.
La serada sará en vëndres ai 26 de setëmber dales 19:30 te Ciasa de Palsa a San Martin de Tor, organisada dal Comité de Raiun Val Badia. Düc é dër bel inviá!

Festa dles lies da munt
Les lies da munt dla Ladinia s’incunta sön Gherdenacia, ai 21 de setëmber
La Lia da Munt Ladinia/Val Badia mët a jí la incuntada dles lies da munt de döta la Ladinia, en domënia ai 21 de setëmber sön Gherdenacia. Chësta incuntada oramai tradizionala röia bele ala 30. ediziun. Por la »Festa dla Lia da Munt« s’incunton sö dala Ütia Gherdenacia, olache al é dales 11:30 na funziun religiosa, abelida dal grup »VolxBrass«. Dedô sarál la pert ofiziala cun le salüt di rapresentanc dles lies da munt ladines y spo vëgnel pité n aperitif y al sará val’ da mangé y da bëre por düc. An pó pié da La Ila sö (dlijia) do le tru nr. 11 o 5A (za. 1 ora y mesa), o jí sö cun le lift cina a 1800 metri y spo inant ciamó 40 menüc a pe. Infos plü menüdes pro Nato al 340 7160952 o info@liadamunt.info.

Cursc da jadiné
L’Ice Club Alta Badia organisëia indô cursc por mitans y mituns dai 4 agn insö
I cursc da jadiné pëia ia ai 22 de setëmber y vá inant cina ai 18 de dezëmber. Por les mitans y i mituns che vá a scora, sará le curs vigni lönesc y mercui dales 16:00 ales 16:45; por mi­tans y mituns dla scolina vigni mertesc y jöbia dales 14:45 ales 15:30, o dales 15:30 ales 16:15. 
Le cost dl curs é de 180,00€ por dui dis al’ede­ma y 120,00€ por un n de al’edema. Por informaziuns y iscriziuns prëibel cherdé sö o scrí al numer 339 4327329, do les 17:00.

Curs de yoga a La Ila
Dai 30 de setëmber inant vëgnel pité n curs cun Gabriel Prada, de indöt 10 incuntades
Le yoga é na disciplina nasciüda dan tröc milesc de agn tl’India. Sëgn é le yoga tres plü conesciü ince chiló da nos, dilan al benefize fisich y mental che al pó porté. 
Le yoga dëida por ejëmpl te situa­ziuns de stress y de tëma, al renforza l’autostima, dëida por la conzentraziun y la produtivité, arfera l’invedlamënt, miorëia la flessibilité y l’elastizité. Le Consëi de formaziun Badia mët a jí n curs de yoga cun Gabriel Prada, te pa­­lestra dla scora mesana a La Ila. Le curs mët man ai 30 de setëmber y vá inant por indöt 10 iadi, cina ai 20 de jená dl 2026. Al gnará fat n grup por prinzipianc y un por progredis. Iscriziuns al numer de telefon 347 5877635.

La reforma dl Codesc dla strada
En mertesc ai 23 de setëmber dales 20:00 él tla Ciasa dla Cultura a La Ila n referat cun i Carabiniers, sön la reforma

• 
•  

View the embedded image gallery online at:
https://www.lausc.it/manifestazions-y-evenc/30351-manifestazions-atuales-speziales#sigProId678af348fc

y ci che an dess savëi
Le Consëi de formaziun Badia mët a jí en mertesc ai 23 de setëmber dales 20:00 n referat tla Ciasa dla Cultura a La Ila. Tema é »Reforma dl Codesc dla strada: ci che an mëss savëi«. 
Al é na ocajiun por imparé a conë­sce y capí te na manira tle­ra les mudaziuns portades ite da püch. Referënc é le lüte­nënt Mirko Vettore — coman­dant di Cara­bi­niers de Badia, le lütenënt Mir­co Macaluso – comandant dl’Aliquota Radio­mobile da Bornech y le magg. Vincenzo Di Buduo – comandant di Cara­biniers da Bornech. La serada é por talian.

»Trëi poec trëi, chiló n’é nia iló«
Letöres de poesies danter talian y ladin
Le Museum Ladin inviëia en mertesc, ai 23 de setëmber, dales 18:00 tl Museum Ladin Ciastel de Tor a letöres di auturs Teresa Palfrader, Silvia Liotto y Nicola Dal Falco. Les döes scrituries y le scritur li fora dla racoiüda de poesies »Tre poeti tre, qui non è là«, stampada y publicada sön na scomenciadia personala y ilustrada dai dessëgns de Barbara Tavella. 
L’introduziun y invit ala letöra é de Carlo Suani. La publicaziun é ponsada sciöche na picia onoranza a n post y a n lingaz, che é le »ladin«. L’entrada é debann.

Di dl barat dla Lia di Culeziunisć
N dumënia ai 21 de setëmber, dala 8:00 nchin la 13:00, tën la Lia di Culeziunisć de Gherdëina si di dl barat per duc i nteressei tla Cësa di Cungresc a Urtijëi
L sarà na bela ucajion per se ancunté, se giamië ora danter culeziunisć y sambën per baraté d’uni sort de marches, vedla chertes, munëides, chertes dal telefon, y n. i.

Jonëza, depresciun y trus de speranza
»Lichter im Chaos«: te n film cunta porsones jones de süa batalia cun la depresciun y ince de sü lomins de speranza. Ai 26 de setëmber a La Ila, cun mësa torona
La depresciun é le tëma che vëgn traté en vëndres ai 26 de setëmber dales 20:00, te na serada tla Ciasa dla Cultura a La Ila. Al gnará mostré le film »Lichter im Chaos – Junge Menschen, Depression und Wege zur Hoffnung«, olache porsones jones cunta te na manira sota de süa batalia cun la depresciun y i trus che i condüj fora dala scurité. Le film ne porta nia ma le dolur, mo ince i pici lomins che dá speranza. 
Döt vëgn completé cun l’intervënt de por­sones espertes, insciö che le film se dá jö por menü cun öna dles maraties psichiches plü slariades fora. Dedô sarál ince na mësa torona cun referënc dl Forum Prevenziun da Balsan y porsones atocades. Organisaziun: Consëi de formaziun Badia.

Vire y sintí le lüch da paur
En vëndres ai 26 de setëmber dales 15:00 él sön le lüch da Murin a Badia n domisdé particolar
La cooperativa soziala AbilNova – zënter de referimënt por la de­ja­bilité sensoriala, dl odëi y dl aldí, y le lüch didatich da Murin a Badia, pîta n laboratore pratich cun jüc y ativités. Al gnará stimolé l’adoranza di sënsc – sura la odüda fora – por cöie adöm le plü infor­maziuns che ara vá y capí l’am­biënt incër nos ia. 
Düc é inviá da tó pert, i posć é limitá. Al é da se scrí ite al 320 7237860. Le domisdé vëgn orga­nisé dal Lüch da Murin y Abil­Nova, cun le sostëgn dl Consëi de formaziun Badia, la Uniun dles Patrones de Badia y la Uniun dles Patrones provinziala.

Second Hand Event
L Circolo–Lia Mostra d’Ert mët a jì n na manifestazion ulache n possa vënder roba de segonda man
N sada ai 27 y n dumë­nia ai 28 de setëmber gëura l Circolo si por­tes dl self dla mostres per l »Second Hand Event«, ulache n possa resservé na lerch per vënder si roba.
L orar de giaurida ntan chisc doi dis ie dala 9:00 nchin la 17:00. 
Per reservé na lerch pòssen cherdé su l 377 5936350. Un n di costa 10 €, doi dis 15 €.