La Usc di Ladins

Al Ski Stadium de Aloch chisc dis se arcedea desvaliva squadres de schiadores. L fèsc a saer la FISI che conscidra chest portoi desche un di zentres tecnics più emportanc del schi alpin internazionèl.

L grop World Cup de velozità de eles aur l 2026 con n stage de arcedamenc da anché, vender ai 2 de jené, fin ai 7. L diretor tecnich Gianluca Rulfi l à convocà Laura Pirovano, Elena Curtoni, Roberta Melesi e la sores ladines Nadia e Nicol Delago.

L grop de ic rua enveze doman, sot la vida del diretor tecnich Massimo Carca che l à convocà Andrea Bertoldini, Jakob Franzelin, Lorenzo Gerosa, Luca Ruffinoni, Enrico e Francesco Zucchini.

Apede ai campions de la squadra talièna, sun Aloch se arcedea chisc dis ence i miores atlec mondièi de slalom strent che se enjigna al apuntament con la 3Tre de Campiglio: la squadra svizra coordenèda da Matteo Joris, Henrik Kristoffersen con sie team, la nazionèla franzousa con Clement Noel, l belgh Marchant e n muie de etres.

Arcedamenc ence su La VolatA sun Sèn Pelegrin olache ruarà atletes de la disciplines sveltes da adertura 14 nazions, anter chestes la Tèlia, Franzia, Stac Unii, Svizra, Republica Ceca, Andorra, Germania, Romania, Neva Zelanda, Polonia e Australia. L é stat anunzià la prejenza ence de Lindsey Vonn, Alice Robinson e Ester Ledecka.

La Olimpiades Milan-Cortina se arvejina en prescia e Fascia seghita a aer n ruol zentrèl tel percors de arvejinament ai gregn evenc de schi alpin. La val vèrda jà al apuntament de Copa del Mond de schi de eles ai 7 e 8 de mèrz con na libera e n superG sun Sèn Pelegrin.

 (vp)