La Usc di Ladins

L Zenter Traumatologich Ortopedich ló dal Distret sanitarie de Sèn Jan aessa cognù averjer ai 28 de dezember. Pec dis inant l’Azienda Sanitèra aea fat a saer che per mencianza de personal no fossa stat possibol l envièr via. Sobito se à ativà l conseier provinzièl ladin Luca Guglielmi e l procurador Edoardo Felicetti tolan contat coi assessores provinzièi competenc per troèr na soluzion. Endèna, ai 29 de dezember, l grop de Consei Neva UAL à manà ite na interogazion a la presidenta del Consei Tea Dezulian per domanèr che l Zenter, presidie essenzièl no demò per Fascia ma ence per l ospedèl de Ciavaleis, vegne avert al più prest. Te l’interogazion l é stat domanà ence la rejons che te Consei General l era stat arsegurà che l CTO vegnia avert ai 28 de chest meis e ence coche l Procurador spiega chesta grieva mencianza de servijes essenzièi (v. articol publicà sun nosc sfoi online angern, ndr).

Do da chest, en mèrtesc ai 30 de dezember, l é ruà la responeta dal Conseier de procura al sozièl Gianluigi De Sirena. »Aldò de la prescion politica da man del conseier provinzièl e di raprejentanc del Comun General – à dit De Sirena - l diretor de l’Azienda Sanitèra Enrico Nava à dat arsegurazions che l CTO vegnarà avert chisc dis che vegn. L problem de la mencianza de personal l era leà ence a la mencianza de cartier. De gra a la desponibilità del Comun de Moena l é stat troà l cartier e avisà l diretor dr Nava che ne à confermà che l Zenter Traumatologich Ortopedich sarà operatif al più prest.«  (Monica Cigolla)