La Usc di Ladins

Le Consëi de formaziun á le compit da organisé inziatives desvalies, sot forma de referac, cursc, workshops o ater, por i zitadins jogn y adulc dl comun. Le Consëi de formaziun Badia é metü adöm da 9 mëmbri atifs, che se incunta regolarmënter por mëte jö n program de formaziun. Al fin dl ann 2024 êl gnü lité le Consëi nü, de chël che al fej pert por i proscims trëi agn Karin Valentini (presidënta), Rossana Todesco, Sara Frenademetz (aiüt scrivana), Otto Moling, Margit Valentini, Giusi Gius, Alexis Bassetto, Maddalena Pescollderungg (scrivana) y Emanuel Gravino (cassier).
Le Consëi de formaziun Badia á metü a jí por l’ann 2025 n program dër ampl, pitan iniziatives de vigni sort, cun tematiches dër desvalies y ponsades por dötes les etés. I temesc che é gnüs ofris reverda la sanité, l’alimentaziun sana, le movimënt dl corp, l’educaziun di mituns, le sport, la natöra, la musiga y i tiers. Tres dër aprijá é i cursc da pastelné, olache i partezipanc y les partezipantes pó mostré süa creativité. Al é ince gnü porté dant documentars cun foto presentan localités dalunc da nos y dër interessantes da descurí. Deplü films, cun le fin dla sensibilisaziun sön tematiches gonot ascognüdes, á ince descedé l’interes de tröc partezipanc.

Deplü nes cunta Karin Valentini t’La Usc di Ladins di 24 de dezëmber