La Usc di Ladins

En chësc de á la Comunité Comprensoriala Val de Puster mené fora le "Raport sozial 2025", olache an ciafa na panoramica di sorvisc soziai che vëgn pitá te nostes valades, y sambëgn ince les statistiches lapró. Chëres mostra cuaji dötes ma de un n vers: söpert. Plü domanda do i sorvisc, plü porsones acompagnades, plü porsones che á debojëgn y i.i. Chësc vel por döta la Comunité de Val en general y por la Val Badia en particolar – olache i orun ti ciaré n pü’ plü avisa.
Pro i sorvisc sozial dla Comunité de Val te nosta valada toca le Raiun Sozial a Picolin, sciöche ince le zënter sozial "La Spona" a Pidrô. Dal Raiun Sozial infora unse le sorvisc de assistënza a ciasa, olache al é gnü acompagné l’ann passé 157 porsones te nosta valada, por indöt 9.258 ores de sorvisc. Cun n aumënt de incër le 50% unse spo l’acompagnamënt soziopedagogich, olache al é gnü acompagné 161 porsones – 103 minorens y 58 adulc. Ara vá inant cun les marënes sön rodes, olache al n’é gnü condüt fora bëgn 4.623, cun n aumënt de bun 500 marënes respet al ann denant. La sora ezeziun che an ne s’aspetass nia é chëra dl aiüt finanziar, olache an é passá dai 165 mile euro paiá fora dl 2023 ai 91.120,53 euro paiá fora dl 2025. Chësc n’á nia da fá cun le bojëgn che é gnü mënder, mo cun d’atri faturs, p. ej. che tres manco jënt pó i damané do. De chësc aspet, di sorvisc en general, dles tendënzes y dles novités unse orü ti damané deplü a Antonia Castlunger, responsabla dl Raiun Sozial a Picolin.

La intervista cun Antonia Castlunger podëise lí t’La Usc di Ladins di 20 de merz  (pablo)