La Usc di Ladins

La burta neva se à slarià fora en prescia en mèrtesc al 17 da sera. Raffaele Rizzi de Grèva, che ai 5 de mèrz l aea compì 44 egn, l à ciapà l bot e i socoridores rué sobito sul post, no i à podù fèr nia per l salvèr.
Raffaele l era n muie leà a sia tera e l vardèa de rencurèr e defener dut chel che de bon e sćiantif chesta tera ne à dat e ne dèsc, jan do a si ideèi ence canche sia posizions a zachei les ge dajea d’impaz.
L era cognosciù te duta la val, l aea na gran pascion per la storia, per la tradizions e la cultura de Fascia. L chieria e l tegnia su desche n melaur i veies documenc, l domanèa fora la jent de età per aer testimonianzes.
Dut chel che l fajea l era ‘al ben del ladin’, con gran amor e atenzion.
Raffaele l à enrescì e didà a portèr inant ence la tradizion veiora de la batoles del vender sènt, che vegn tegnuda su amò anchecondì proprio a Ciampedel: chest an l bater fort e ritmà de chest èrt veior sarà dut dedicà a el.
La comunanza ladina de Fascia ge disc n gran detelpai, e la l recordarà per chel che l à ensegnà, con sia pascion e sie ejempie.

Podede lejer dut su La Usc dai 20 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)