La Usc di Ladins

Incö él la festa di peri y le pinsier che i oress partí cun os por l’ocajiun, mët man cun n rècord che n’é nia propi da bravé. Sura Nadé âi ciafé la poscibilité da ti cumpré jö a zacai le schipas sajonal. En San Stefo danmisdé unse fat ia la burocrazia, en San Stefo domisdé êi bele te spitol: fratöra dl omerus, sis edemes de convalescënza. Do n per de dis de destrates y meses corëtes por imparé da me vistí, él gnü jená y al á indô metü man la scora. L’Advënt m’â salpü bindebó strancius y plëgn de laur, porchël me confortâi a n per de dis de vacanza da Nadé, mo sëgn êl te n colp dis chîc cun n gröm d’ores da implí fora.
Por ciafé na routine, m’ái tut dant da acompagné mi mënder de 10 agn vigni de a scora. Dales 7:22 pié ia, dales 7:36 a destinaziun: 14 menüc a pe, tl’aria frësca, zënza smartphone o d’atres destraziuns. Ma pere y möt.
I me fajô tres plü morvëia ci che i sciafiân döt da baié te chël püch tëmp y ci tematiches che al gnô fora. Ara ne nen jô nia ma de compic por la scora, de süa pasciun por les drones o de chël malan de jüch de »Brainrot«, mo ince de sües tëmes, dl bel o dl bur’ som che al â fat la nöt denant, di pici stritoc y dles desfides cun i compagns, de ci che ti stô a cör. Chësc m’á mostré sö che 14 menüc veramënter presënc pó cinamai ester deplü co n domisdé passif danter scüfs da fá ia, o televijiun, o scroll sön smartphone. Cualité é deplü co cuantité – dij n proverb.
I m’anadá ince tres deplü tan snel che le tëmp passa. I sun pere da 22 agn incá: na scora de vita olache i m’ess gonot dejidré n liber dles istruziuns, olache i sun slisoré sön n valgönes »dlaces dl’educaziun« y ciumpedé te zacotan de peres sön tru, mo ince na scora che m’á daidé crësce, madorí y scinché tan de ligrëzes y morvëies. 
Dal mëteman êl n gröm de »pröms iadi«: la pröma parora, le pröm bagn, i pröms vari, le pröm de de scora, la pröma Santa Comuniun, le pröm iade che le möt te ciara sciöche te foss so monn, le pröm iade deboriada en tënda o cina söla piza de n crëp. Cun le tëmp ál metü man da gní tres plü »ultims iadi«: dal’ultima sbürla cun le baghele al ultim panolin, dal ultim iade che te pos le tigní te brac al ultim iade che i mituns ó se indormedí cun te te let, cina al ultim iade che ai te dá la man sön strada. N gröm de »ultims iadi« che vëgn gonot zënza t’al dí danfora. Te fejes na cossa y ne sas gnanca che al ê l’ultim iade.
Porchël sái che al gnará ince l’ultim iade che i pó jí impara a pe a scora. Tlafinada rovarál ince ël te chë ete, olache i jonins á plü ion sce i geniturs s’un stá dalunc assá canche al é sü amisc, olache al me dijará »i vá dassú«. I mituns ciafa les ares y jará do sü trus, sciöche al é dërt che al sides. Y ci che é passé ne gnará mai plü zoruch. I n’ascogni nia che al me sá n pü’ da incrësce da scrí chëstes parores. Chi 14 menüc é insciö deventá n tesur prezius che i ó me tigní toch ince sëgn che le brac é indô cuncé. Te n tëmp olache le valur de na cossa vëgn gonot ma mosoré te euro, me pënsi che le tëmp che n pere y na uma passa coscientamënter cun so möt, é »n investimënt chît« che portará früc por na vita... speri. Chësta é porchël l’audanza che i ti feji a düc i peri: 14 menüc – almanco.