La Usc di Ladins

L atach de Israel e USA al Iran à soscedà tema e cruzie te dut l mond. Fin dai prumes dis ence Emergency, te si zentres sanitères tel Afghanistan, à cognù chierir de salvèr persones ferides dai bombardamenc ai confins col Pakistan. La sociazion metuda su da Gino Strada à tout posizion.
Vedon amò n'outa l faliment de la politica internazionèla - disc Emergency - che no la é più bona de responer a la costions internazionèles co la diplomazia ma demò con la forza melitara, con efec dramatics per la popolazion zivila.
Dedant a dut chest Emergency envia duc i sentadins de la Tèlia a se fèr sentir per domanèr che l Goern con l'Europa ge vae do al ejempie de la Spagna e che l derit internazionèl e l stravardament de la popolazions vegne dant da la doura di armamenc.
Ge vegn domanà al Goern talian de respetèr la Costituzion che 'ripudia' la vera desche strument de soluzion di contrasć e donca de refudèr de aer na pèrt, diretamenter o indiretamenter, te operazions militères contra l Iran e no consentir che da le basi militères USA de la Télia posse peèr via azions de atach fora dal derit internazionèl.
Per sostegnir l'atività de Emergency se à mobilità ence la delegazion de la Valèdes de Fiem e Fascia. Te chest temp inant Pèsca vegn venù la colomba de la pèsc de Emergency e l é stat dat adejion a la scomenzadiva 'Cento cene per Emergency' con l'adejion del Restorant Miola de Pardac.
Per info se pel chiamèr l numer 349 8042968 o scriver a fiemme-fassa@volontari.emergency.it.

Podede lejer dut su La Usc dai 13 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)





 (Lucia Gross)