La Usc di Ladins

Ostí sön la dlacia
Le Lech da Sompunt i fajará da cornisc ala cëna söl program ai 29 de jená, che vëgn abelida cun deplü esibiziuns sön i jadins dapert dl Ice Club Alta Badia
La secunda ediziun dla manifestaziun »Ostí sön la dlacia« vëgn metüda a jí ai 29 de jená dales 17:30 sön le Lech da Sompunt a Badia. Le lech dlacé se trasformëia te n salf alaleria, olache al vëgn pité na cëna cun spezialités dl post arjignades ca da deplü coghi y pec dl post. I sommeliers de Südtirol jará incërch cun i jadins por ti juté sö i vins de Südtirol ai partezipanc. Le grup dles jadinadësses y di jadinadus dl Ice Club Alta Badia acompa­gnará la sëra portan dant n valgönes esibiziuns sön la dlacia. Sambëgn ne manciarál nia val’ boanda cialda por se scialdé. Por tó pert ala manifestaziun mësson se scrí ite pro i ofizi turistics dl’Alta Badia o sot la plata internet www.altabadia.org, olache an ciafa ince deplü informaziuns. Le cost é de 50,00€ por adulc y 25,00€ por mituns da 6 a 12 agn. I posć é limitá. Al ti vëgn aconsié ai partezipanc da lascé i auti tla plaza da parché dlungia l’implant »Sponata« y anuzé le sorvisc de taxi.

Garejedes de slalom strënt
L Schi Club Gherdëina nvieia a doi garejedes de slalom strënt: l Raiffeisen Grand Prix LandesCup U14 ai 24 de jené te Val y l Finstral Cup ai 25 de jené sun Piz Sela
La garejeda de slalom strënt Raiffeisen Grand Prix Copa provinziela U14 ie n sada, ai 24 de jené sun l purtoi Cir te Val, per atlec nasciui ti ani 2012 y 2013. La scumëncia dala 9:30 cun la prima man­che y riesc do cun la segonda. La pre­miazion sarà ntëur la 13:00, japé dl purtoi dan la utia Ciampac.
N dumënia ai 25 de jené dala 9:45 saràl pona la garejeda Finstral Cup (ex VSS) de slalom strënt sun Piz Sela per la cate­guries cuccioli y baby, nasciui ti ani dal 2014 nchin al 2017. La premiazion ie ntëur la 13:00 sun Plan de Gralba.
Duc i apasciunei de schi ie nviei a unì a ti cialé a chisc pitli campions dl daunì.

Inaugurazion ufiziela dla mostra nueva
L Museum Gherdëina nvieia ala giaurida ufiziela dla mostra nueva de scultures »Pec de

• 
•  

View the embedded image gallery online at:
https://www.lausc.it/manifestazions-y-evenc/31122-manifestazions-atuales-speziales#sigProIdc5805f1980

n mond«, ai 29 de jené dala 18:00 tl segondo partimënt dl Museum
L Museum Gherdëina nvieia i vijitadëures a ti cialé al’ert dl ziplé y dl depënjer de Gherdëina te n barat cun l mond sëura la valeda ora. Chësta mostra lascia udëi coche artisć, artejans y mar­cadënc de Gherdëina fova cunliei cun l’ert y la curëntes cumerzieles europeiches – caraterisedes dala cultura dla chëurtes, da vijions colonieles y da tradizions locales. Tl medem tëmp criovi n si mond iconografich, che spidlea la vita da paur tla Dolomites, l artejanat y si imaginazion artistica. Danter la imaja de sé y la ududa dl mond neguzieia la figures dumandes de identità, aprupriazion y reprejentazion – y mostra coche l se à furmà tl 19ejim secul n cheder »tradiziunel« de Gherdëina. La curadëssa dla mostra ie la storica d’ert Jamila Moroder. Orares: dal lunesc al vënderdi, dala 10 ala 17. Info: www.museumgherdeina.it

Cun i schi a löm de ciandëra
La pista »Gherdenacia« a La Ila gnará ilominada ai 30 de jená da sëra, ti don la poscibilité ala jënt da jí cun i schi ince plü tert
En vëndres ai 30 de jená vëgnel metü a jí la manifestaziun »Cun i schi a löm de ciandëra«. Dales 20:00 ales 22:00 podarán jí cun i schi ince da sëra, sön la pista »Gherdenacia« a La Ila, che gnará ilominada tres jö da chentli y füc. La pista sciöche ince la Ütia Florian restará davertes cina ales 22:00. Pro la staziun a val dl implant sarál ince intratignimënt musical cun n DJ. Por la segurëza mëss vigni schiadú avëi na löm da frunt, che an pó ince se im­presté fora pro l’implant porta­munt. Por podëi tó pert al’inizia­tiva mësson avëi na cherta di implanc che vel plü dis.

Renforzé nüsc mituns por la vita
Le Consëi de formaziun Badia mët a jí en vëndres ai 30 de jená dales 19:30 na serada cun Doris Kaserer, tla Ciasa Runcher a Badia
Ci renforza pa te n möt la con­­scidraziun de se instës? Ci desfarënzia él pa danter stima de se instës y crëta te se instës? Y co podunse pa so­stigní nüsc mituns por afronté les desfides dla vita y tí jí pormez cun resi­liënza? Ci influs á pa chiló les convin­ziuns che i un sura nüsc mituns? 
De chësc y ater vëgnel baié tla serada dal titul »Ich mag mich – Kinder fürs Leben stär­ken«, che le Consëi de formaziun Badia mët a jí en vëndres ai 30 de jená dales 19:30, tla Ciasa J. B. Runcher a Badia. Referënta é Doris Kaserer.

Benedisciun di orghi, cun »Evensong«
En mercui ai 28 de jená dales 20:00 él a Oies la presentaziun y benedisciun di orghi de dlijia, cun na funziun ciantada »Evensong«
Defata do la bela esperiënza dl teater musical de­diché a sant Ujöp da Oies, á i organisadus da inlaota (Müjiga de Badia y Sorvisc ai Jogn Val Badia) albü l’idea da lascé n sëgn che podess doré inant, chiló tl post nadé de siur Ujöp; val’ che daidass onoré y valorisé inant la figöra de nosc sant, conesciü oramai sura döta la provinzia y ince foradecá. La dezijiun é stada chëra da ti scinché n orghe ala dlijia da Oies, y conscidran les carateristiches y i debojëgns dla dlijia, él gnü cumpré n orghe digital dla dita todëscia Kisselbach, n stromënt cun tröpes poscibilités d’espresciun y cun na gran varieté de sonns. En la vëia dla festa de sant Ujöp Freinademetz, ai 28 de jená dales 20:00, gnará l’orghe presenté y benedí, tratan na funziun ciantada »Evensong« cun ciantadus y ciantarines de deplü cors dla Val Badia. La jöbia ai 29, festa de Sant Ujöp, vëgnel sciöche vigni ann festejé le Sant dales 16:00 cun la mëssa solëna, sonada y ciantada.