La Usc di Ladins

L é jà da egn che l Comitat de endrez de la Marcialonga l à entenù che i picoi l é l davegnir ence per chest event, e l à scomenzà a meter a jir de picoi projec te duc i livie de scola per i arvejinèr al paslonch e a la maor competizion talièna de chesta disciplina.
I raprejentanc del Comitat Marcialonga i va ogne an te la scolines a rejonèr de la Marcialonga e a ge dèr balons, bandierines e etres gadget envian duc i picoi a jir enlongia l percors a engaissèr i concorenc e chest an, per rengrazièr bec e maestres de sie empegn e de la bona colaborazion.
Chest an, apede a dut chest, l é stat ence n moment dassen spezièl: en mercol prum de firé beleche n centené de picioi de la trei scolines provinzièles de Soraga, Pera e Cianacei, i se à binà duc ensema te Fraine per na bela giornèda de festa su la neif, de gra al coordenament de Stefania Zorzi per l Comitat de la Marcialonga e de Stefania Paluselli per la scolines.

Te na bela giornèda de pien soreie i picioi à podù se goder n sach a sluzièr su la neif e jièr con Fondolo, la mascotte de la Marcialonga, che à tout pèrt a la giornèda e l à portà ence n belot trofeo che l Comitat à enjignà per chesta ocajion.

De più su La Usc stampèda de vender ai 10 de firé.  (Lucia Gross)