La Usc di Ladins

Che él la piramida alimentara? E la proteines? E i grasc? Perché pa ge vel i magnèr? Proèr a ge spieghèr chisc conzec a bec picoi de 6 e 7 egn no l é sorì, ma se se taca prest a ge passèr chesta nozions l é più fazile che i se arvejine al magnèr a na vida più sèna e che, soraldut te la menses de la scoles, i magne dut chel che ge vegn dat. Per chesta rejons l Comun General de Fascia, tras sie referent per l servije de la menses Devi Brunel, à endrezà na lingia de scontrèdes coi scolees de pruma e seconda populèra de Fascia e la dietista e referenta de Cirfood Roberta Casarotto. Cirfood l é belapontin la firma che à l apalt per la menses de la scoles de Fascia. Do aer scontrà duc i scolees, en jebia sera l é stat metù a jir ence n enconter online con i genitores enteressé.

En lunesc da doman te Sorastanza de la Scola de Fascia l é ruà i bec de pruma e seconda populèra de Poza. Dantfora l é stat la Conseiera de procura del Comun General Mirella Florian che ge à spiegà che l é emportant aer na alimentazion dreta, saer che che l é benfat magnèr e cotant n magnèr percheche a chesta vida l corp respon miec e i bec é bogn de tegnir fora duta la ativitèdes che i fèsc via per l dì, tant a scola che tel temp ledech.

De più su La Usc stampèda de vender ai 17 de firé.  (Monica Cigolla)