L snowboard cross à vivù meisc de longia paussa spetan de doventèr endò protagonist anter la competizions invernèles. Zacan la brees à podù endodanef se encrojèr sui portoes de la Tèlia e del Mond e coscita ence l’atleta ladina Caterina Carpano à de nef scomenzà a batalièr. Dò la garejèdes de Copa Tèlia states a Colere anter i 16 e 17 de jené, l SBX à fat tapa a Chiesa en Valmalenco per la pruma tapa de Copa del Mond con n lonch week end de competizion e i compliments che ge va a la Tèlia, bona de meter a jir na competizion che duc aea cognù sburlèr.
En vender l’é jit coscita en scena la pruma proa, chela de calificazion per la garejèda del sabeda, con i atlec de cèsa en gran forma e che se à prenotà tropes posć per la dì dò: anter la femenes l’é stat adertura dutes 5 les atletes a se vadagnèr l pass te la 16 finalistes, e ence anter i omegn i é stac de 5 a se loghèr ti 32 per la gara del sabeda.
Michela Moioli de or
En sabeda ai 23 se à coscita coret la pruma de la doi gares del fin de setemèna de brea. La fascèna Caterina Carpano, che se aea logà col 12° temp, l’à cognù partir te na baterìa trop competitiva ti oteves de finèla e per via de n fal te la partenza no la é stata bona de ruèr ai quarti.
De più sun La Usc 04 di 29 de jené
(Daniele Verra)
