La Usc di Ladins

L'edema passada, dai 13 ai 18 de merz, él sté a La Thuile, tla Val d'Aosta i Campionac Nazionai de schi por la categoria Aspiranc. Ti sis dis de gares s'á i atlec y les atletes mosoré te dötes les disciplines, scomencian cun les disciplines tecniches, slalom strënt y slalom lerch, por jí inant cun na combinata y stlü spo jö cun le superG y la discesa. Tl slalom se á alzé fora l'atlet fascian, dl schiclub Monti Pallidi y dl Ski College de Fascia, Federico Fontana, che é rové sön le scalin plü alt dl podest, davagnan la medaia d'or. Brom por Edoardo Baldo da Ampëz, che á ince garejé tles atres competiziuns realisan n 7. plazamënt tl gigant, n 9. post tla combinata y rovan al 20ejim post tl superG. Tl slalom lerch á ince arjunt n bun 9. plazamënt n ater atlet de Fascia: Tommaso Mobiglia.
Tla categoria feminila é Rita Granruaz dl Ski Team Alta Badia stada la miú atleta ladina, cun la medaia de brom davagnada tla discesa. 19. post por Sofia Vadagnini da Fascia, les döes gherdënes Nicole Ploner y Magdalena Pircher s'á plazé al 10. y al 17 post. Rita s'á ince plazé al 17ejim post tl slalom lerch.   (kp)