Monica Zanoner de or

Data

23 de merz 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La fascèna à vent l titol de campiona talièna assoluta te la libera a La Thuile. Etres ladins sul podie.

En mercol ai 22 de mèrz Monica Zanoner da Ciampedel, à vent sul portoi  La Thuile la garejèda de libera de valuta per l titol nazionèl assolut. N bel suzes per la atleta del 1999 del Eserzit, che la se à lascià tedò con 21 centeisemes de destach la joena atleta del Trentin clas 2006 Ludovica Righi. Sul terz sciaier del podie l é jit n’autra ladina, Nicol Delago da Selva de le Fiamme Gialle, e sobito do troon amò na atleta de Gherdena, Sara Thaler da Ortijei del SC Gherdena Raiffeisen, clas 2004 che apede al 4° post assolut la se à vadagnà ence l arjent te la categoria Joegn. 

La atletes ladines à arjont de etres bogn piazamenc: Teresa Runggaldier da Selva de le Fiamme Gialle l 7° post, la badiota Vicky Bernardi che cor coi Carabinieres l 9° post e amò la doi U20 de Gherdena e Fascia Nicole Ploner e Sofia Vadagnini respetivamenter l 16° e 17° post assolut e l 6° e 7° de la categoria Joegn.

Anter ic la venta é jita a Christof Innerhofer e i miores piazamenc ladins l é stat chi de Max Perathoner de Gherdena 12° e de Thobias Kastlunger de Mareo 15°, duc doi atlec de le Fiamme Gialle.

Anché 23 de mèrz l é stat enveze la garejèdes de SuperG, e chiò la miora ladina l é stat Teresa Runggaldier de le Fiamme Gialle. La atleta da Selva é ruèda con n destach de 75 centeisemes da la venjidora Federica Brignone e tedò da Elena Curtoni e l’à fat miec de la fascèna Monica Zanoner, che tel SuperG l’à cognù se encontentèr de la medaa de legn. Amò en classifica la ladines Nicol Delago al 9° post, Sofia Vadagnini al 17° e 6° di Joegn, Chayenne Kostner 18^ e 7^ Joegn e Nicole Ploner 23^. Chayenne Kostner se à vadagnà ence l 6° post de combinèda alpina, olache Nicole Ploner é ruèda 13^. 

Anter ic tel SuperG l é al 15° post Tobias Kastlunger, che se à vadagnà la medaa de arjent te la combinèda tedò da Matteo Franzoso ence el Fiamme Gialle, da Sestriere.

La garejèdes va inant ai 24 e 25 de mèrz col slalom lèrch e strent de ic e de eles. 

De più su La Usc stampèda de vender ai 31 de mèrz.  (Lucia Gross)