La Usc di Ladins

Fenesc con 1 pont la sajon del Fascia Balon de gra al pareje contra l Primier. Ti prumes menuc l é l ciamp che à la miec con le doi squadre che no le é bone de ge dar cruzies a le doi defendure. La pruma ocajion rua al 20° con Massimo Lorenz de Meca che da ite de l’area de rigor l proa la trata che ciapa de pien l remenat aut. Passa autres 10 menuc e l Fascia risćia de passar inant co la trata dai 25 metres de Massimo Lorenz che fenesc sul remenat aut. 

Ti menuc de recuperament del prum temp rua na docia giaciada per i fascegn, che do aer mencià per pech de passar inant con na bela ocajion no desfrutada da Sami Said, i ciapa l gol da man di patrogn de ciasa con n contropé che rua tedò l joen portier 2004 da Moena, Andreas Sommariva. 

Ti secondi carantacinch menuc Petrone e compagnes proa a drezar la endesfida e do n cart de ora rua l gol fascian con Giacomo Deflorian Felix che met l balon te sach con na trata da ite de l’area de rigor, do la trata dal cianton de Massimo Lorenz. 

De più con la classifica finèla e la ultima partides de la squadres mendres su La Usc stampèda de en vender ai 31 de mé.  (Pierpaolo Rasom)