La Usc di Ladins

Endò na garejèda con n bon resultat l se à portà a cèsa nosc atlet da Vich Mauro Rasom. En domenia passèda a la 52^ edizion de la »Camignada poi siè refuge«, endrezèda dal CAI de Auronzo, l se à vadagnà la seconda piaza de la classifica generèla.

La Camignada l é na gara de corsa sa mont, no competitiva, de 30 chilometres che se dejouc encomai da tradizion la pruma domenia de aost. La pruma edizion la é stata del 1973 con 153 scric ite. »La gara é peada via da Misurina, da Auronzo, e la passa apede le Trei Cime de Lavaredo - ne à despiegà Mauro - l percors l cor enlongiajù le sie utie più cognosciude de chel raion: Auronzo, Lavaredo, Pian de Cengia, Locatelli, Comici e Carducci. L é na gara storica che à arjont la 52^ edizion«.

Al travert Mauro l é ruà secondo sul podie con n temp de 3h03’51’’, tedant al terzo classificà Giovanni De Bon (3h04’01’’) e tedò a Gabriele Del Longo, ruà prum (3h03’46’’).

De più su La Usc stampèda de en vender ai 8 de aost del 2025  (NICO)