La Usc di Ladins

L é stat na Marcialonga epica, per gregn eroes, e duc, dal prum al ultim, é stac dalbon eroes. 70 chilometres sot la neif, zenza scines, con i schi e i bachec che fonèa ju te la neif frescia, da no poder veder fora coi fioches che se tachèa sui vegeres e la fadia, na fadia da no creer. La 53^ edizion de la Marcialonga de Fascia e Fiem de en domenia ai 25 de jené i se la recordarà duc n gran pez.

»A veder l temp de anché (en lunesc l era dut seren, ndr) somea na barseleta, fossa stat l ambient ideal – ne à dit Manuel Bernard da Pera che à fat la gara ence chest an regolà su da vichingo – per solit le gare coscita eroiche l é chele che me piasc, ence se chest’outa a mesa gara no pissae proprio coscita. La é stata n muie grieva percheche no l era scine, ne en su ne en ju, no se podea pussar le ame, i schi no tegnia nia, i brac tu i cojinae sobito, defat dotrei amisc à molà, pecià. Una de cheste gare la val desche trei o cater de chele en condizion otimale… Da cornisc a dut chest l é che canche se se metea su i veiares, con lenti chiare per veder miec te na dì coscita, fiocaa ite ence da le man, duc à bele podù se i meter te guofa e ti toc de sora en ju no se vedea nience fora percheche te fiocaa su per i eies. A rejonar con i atlec del nord, che canche i me veit regolà su da vichingo do la gara i me domana de far na foto, ence chi che fasc gare dut entorn i me à dit che una gara scì dura beleche mai i l’à veduda, donca l é amò maor sodesfazion per esser rué junsom deldut.«

N auter atlet che de Marcialonghe l n à fat adertura passa 40, chesta l era la 41^, ne à dit che l é stat na bela gara. Elio Decrestina da Soraga l ge à metù demò 5 ore e 17 a ruar fora Ciavaleis. »I prumes atlec i jia via più peigres, noi vindò eraane belebon svelti ence se scine no n era, i schi e i bachec fonaa ju te la neif, gio son lijier e donca de chest vers é abù n picol vantac… A la dir duta sot la pievia fosse stat beleche piec, gio son pontà via scuert e fin a Pardac son jit benon, do é scomezà a aer freit percheche ere mol deldut. Da Soraga eraane de n bel grop, 13 o 14 segur, chisc dis che vegn se troaron a se magnar na pizza per se la contar e se engaissar su. Ma no sé vè se n faré de autre…«

Podede lejer dut l articol su La Usc nr 4 de en vender ai 30 de jené del 2026  (Monica Cigolla)