La Usc di Ladins

En lönesc ai 12 de jená, s’ál tigní tla Ciasa de Cultura a La Ila na serada cun mësa torona, dedicada ala colaboraziun danter scora y uniuns dal sport. Da deplü agn incá colaborëia les Scores Altes La Ila cun uniuns dl sport desfarëntes tl cheder dl proiet »CONI–Scora dl sport«. Cun le travert de dé plü flessibilité a jones y jogn che aspirëia a na cariera sportiva agonistica y i sostigní tla realisaziun de n percurs formatif individual, ciara les döes perts devers de n program scolastich adaté, che dá la poscibilité da integré ores de sport y de alenamënt miré tl orar scolastich. Colié l’istruziun al’impëgn sportif é stada la tematica dla serada. 

Cun moderaziun de Thomas Valentini, mëmber dl’Uniun sport La Ila, él rové dancá deplü ghesć, surastanc de uniuns sportives y scolastiches, sciöche ince autorités. Rapresentanc dles scores y de assoziaziuns á tut parora por porté le salüt al publich y presenté le proiet nü »Passion school«, che piará ia por i studënc dles Scores Altes La Ila tl ann scolastich 2026-2027.



Deplü da lí ciafëise tla ediziun nöia de La Usc di Ladins de chësc vëndres, ai 23 de jená!