La Usc di Ladins

Fascia sera su l 2025 con 9.860 sentadins, -53 dal an dant. Do n an col segn positif, l an passà la era jita su de 15 persones, la va endò de zeruch desche del 2022 e 2023. A la fin del 2024 defat la dombrèa 9.913 persones, 4.879 ic e 5.034 eles, a la fin del 2025 l é 4.851 omegn e 5.009 femenes. Chest vel dir che Fascia, tegnan cont del scialdo natural e de la desferenza anter vegnui ite e jic fora, l’à perdù 28 ic e 25 eles.
Duc i paijes à l segn negatif fora che Mazin che enveze cresc de 7 persones. A la fin del 2024 i paijes col segn negatif era demò Moena e Ciampedel.
Del 2025 i morc é stac de più che i nasciui te beleche duc i paijes fora che a Soraga, n paisc che en proporzion al numer de sentadins à n bon numer de cunes.

Sul sfoi stampà dai 23 de jené l é duta la informazions con tabeles, resultac paisc per paisc e ence la neva del prum piciol nasciù del 2026: l picol Diego l aea tanta prescia che i genitores no é rué a jir te ospedèl e l père à cognù fèr da "mamana".

La Usc é da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper).  (Monica Cigolla)