La Usc di Ladins

Passa 1800 atlec da presciapech 30 nazions à tout pèrt a la 24^ edizion de la Marcialonga Running  Coop pontèda via en sabeda ai 5 de setember domesdì da Piaz de Sotegrava ja Moena. La garejèda maora da 26 km la é stata venta da Said Boudalia (1°28’52’’) e da Greta Haselrieder (1°41’19’’); sunsom l podie de la mesa maratona da 21 km l é enveze ruà Collins Kiplangat (KEN, 1°04’05’’) e Giorgia Bonci (1°20’55’’).

La gara maestra
L era da passa diesc egn che l titol mascolin de la 26 km no vegnia vent da n atlet talian. L prum post l é stat bon scombatù anter l belumat Boudalia (clas 1968) e l atlet kenian Dennis Cox Lopua, che l se à vadagnà la seconda piaza: l é stat su l’ultima pontaa dant de ruèr su a Ciavaleis che  se à dezedù l venjidor canche Boudalia é stat bon de passèr inant e destachèr Lopua, ruan al travert 1’30’’ dant.
La paroles del venjidor: »Aee vent jà del 2015 ma segur anché no me spetèe n tèl resultat. L ritm l é stat muie aut… venjer endodanef l é stat maraveous«. »Old is gold!«, chesta la parlèda de Lopua tel ge fèr i compliments al prum atlet, sotrissan sia età. Terz classificà Simone Peyracchia, che à coret la competizion en onor de sie amich Luca Marengo, partezipant fideil de la Running Coop e che à ciapà na malatia rèra.


Podede lejer dut su La Usc stampèda de vender ai 11 de setember da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Nicoletta Riz)