La Usc di Ladins

Danter i 5 y i 6 de setëmber s’ál tigní le torné »Rodeo« a Al Plan de Mareo por la terza y la cuarta categoria. Le torné á odü la secunda ediziun metüda a jí dal Tennis Club Mareo. A daidé do le garaté dla manifestaziun sportiva él sté le bel tëmp, che á cher dé adalerch cotan de spetadusc. Tla categoria di ëi á i atlec dl TV Ahrntal albü le plü suzes: bëgn trëi di cater atlec che á soghé la mesafinala ê de chësta scuadra.

Tla mesafinala ti éra garatada a Thomas Auer da bat le sogadú de ciasa Juri Menegot dl’Uniun Amatoriala Tennis Mareo cun n resultat de 4:1, 4:1. Tl’atra mesafinala á Armin Leiter batü le compagn de scuadra Robert Elzenbaumer cun 4:2, 5:4. Rová adöm tla spilnada finala é porchël i dui colegs dla medema scuadra Armin Leiter y Thomas Auer, olache Auer á messü zede ai colpi de parota strategics de Leiter cun 4:2, 4:2. Pro les ëres é la sogadëssa de ciasa Flaminia Accorinti (Uniun Amatoriala Tennis Mareo) rovada cinamai te finala. Do avëi batü Anja Plaikner (ASV Kiens) te mesafinala, stlujon jö la partida al terzo set cun 8:9, s’ára mosoré cun Kathrin Mayr da Valdaora, che n’é nia stada da bate cun 5:3, 4:0. Armin Leiter y Kathrin Mayr é i davagnadus dla secunda ediziun dl torné de tennis amatorial.


Deplü ciafëise da lí tla ediziun nöia, publicada ai 18 de setëmber!