La Usc di Ladins

L é suzedù danoo. Sta ota ‘l ea doa turistes che vegnia da ‘l Belgio, de trenta ane, gnanche tośateles. S é moestes a pe da Son Śuogo, su par el troi Cai 215, par ruà su da ‘l lago de ‘l Sorapisc, a ‘l rifujo Vandelli, a caminà inze ‘l gnee, con scarpe leśiere e ‘na gucia, zenza ‘na fanela. Canche ‘s é ruades agnó che ‘l é nafré de voito de sote, un funazo e chi sciaris de fer, ‘s à abù festide, beleche inbramides, e ‘s à ciamà i socorse. Da Piee de Cadore ‘l é moesc ‘l elicotero de el Suem. I à molà śo el dotor e el tecnico de elisocorso, che i à leà sta does co ‘na corda, da res ciarià su e res menà fin da ra machina. L ea anche i ome de el Sagf de ra Finanza pronte a meo, se ‘l ea biśoin. Chesta does ‘s aea vedù el lago zeleste, coscita un bel, su i social, e ‘s à pensà de moe, coscì, zenza gnanche saé ce che ‘s fajea.