La Usc di Ladins

La sociazion Bela Ladinia à peà via con gaissa la sajon da d’invern.
La pruma assemblea, che à avert a sajon 2019/2020, la é stata  ja Soraga ai 29 de novembre del 2019 e l’é stat na bela ocajion per ge portar dant ai sozi i bilanzes e i programes de la sozietà per l’an passà e per l’an che vegn. Dedant a na sala piena e rasa de jent, l President Mauro Sommavilla l’à volù ge sporjer n bel devalpai a dut l diretif che, con gaissa e legreza, l lo deida a portar inant l’atività de la gran e bela familia de Bela Ladinia. N gran devalpai dò l ge é stat sport desche zenza ence a duc i sozi (passa 180 ence chesta outa!!) che l’é l motor de noscia sozietà.

Desche duc i egn na part del bilanz de Bela Ladinia la é stata data desche bonaman a na familia che la é dò che la passa n moment senester.

L’é stat amò apede premià l’atlet de la sajon, pest che per la sajon passada l ge é stat dat al joen Luca Vuerich, ejempie de coche se pel se dar jù te la scola e tel sport, con umilità e gaissa, valores che aldidanché à na emportanza dassen grana, soraldut ti joegn!

E dò la part più ofiziala ge é stat dat lèrga a n bon piat de pasta enjignà dai chef che ne dasc semper na man e n bon douc per fenir la scontrada.

Ai 15 de dezember enveze l’é scomenzà la sajon coi schi ciolé, n bel schiap de pascioné é pontà demez su per Duron e, spartii te doi gropes, i é rué a arjonjer so zil: chi la ponta de Sas Piat e chi le piane de Duron.

Duc se à binà endò ensema te la Utia Micheluzzi per n aperitif da marevea e do jù, a Ciampedel, per na bona marena aló da l’Hotel Ramon, con musega, bai e legreza, aldò del sćiantif »Bela Ladinia style«! 

E vedù che chest an neif n’é, aon pissà de endrezar ence doi sere de segureza sa mont: una teorica, che la vegn metuda a jir en vender ai 10 de jené te Comun general da le 9.00 da sera, e una pratega, endrezada per en mercol ai 15 de jené da mese le 9.00 da sera te n post amò de dezider, dut chest co la colaborazion del Socors da Mont. 

Le scontrade le é averte a duc, per aer maor informazion podede chiamar l numer de Bela Ladinia 334.9052429 o scriver a la mail info@belaladinia.it

Speron de ve veder de n muie a cheste scontrade e entant ve auguron n bon 2020, rich de legreza, sanità e amor!

 (SM)