La Usc di Ladins

En vender sera ai 30 de otober l'é stat la litazions per l nef president de la Federazion di Studafech del Trentin e te chesta encèria l 90% di Comandanc di gropes di Studafech de la provinzia (ben 186 sun 209) ge à dat sia stima a Giancarlo Pederiva.
Pederiva l'à 56 egn, l'é da Poza e l'à na storia familiara n muie leèda ai Studafech. Sie père Adolfo l'é stat Comandant di Studafech e sie bèrba Otto Florian l'é stat no demò Ispetor de Fascia per 30 egn, ma ence un di fondatores de la Federazion. El à fat l melitare ti studafech e dò na parentesa per lurier del '93 l'é jit ti studafech volontères. Dal 96 l'é doventà Vizecomandant del grop de Poza e del 2008 comandant fin del 2013, canche l'é doventà Ispetor de Fascia.
Pederiva l'era jà da 4 egn te la jonta de la Federazion e sia nomina la va tel segn de la continuità con la gestion de chisc egn passé col president Tullio Ioppi. La sburocratisazion e na maor otimisazion di corsc per i studafech volontères l'é anter i prumes obietives che l se met dant.
Te Fascia sia neva encèria é stata touta sù con mingol de malcontent ajache ades l cognarà dèr la demiscions da Ispetor. Per schivèr l pericol che reste descorì l post, jà chisc dis passé l'é stat nominà vizeispetor Alessandro Pellegrin, ex comandant del Grop di Studafech de Soraga; tel meis de november vegnarà fat la litazions e dapò la Jonta provinzièla nominarà ofizialmenter Pellegrin Ispetor de Fascia.
Su La Usc de vender ai 6 de nobember se podarà lejer duta l'intervista al nef president fascian de la Federazion di Studafech del Trentin.


 (Lucia Gross)