La Usc di Ladins

I era ben de 40 i scric ite al concors metù a jir chest istà dal Comun de Cianacei per l post de nef colaborator de la Biblioteca. Tenc che, descheche l’era pervedù tel bando, l’é stat fat na preselezion, per cerner fora no più che 20 candidac ametui al concors. Da chisc, dò la proa scrita demò de 4 i à arjont la valutazion perveduda e chela più auta l’é stat chela de Daniele Verra, che se à confermà al prum post ence te la proa a ousc.

Daniele Verra l tacarà a lurèr te Biblioteca jà en lunesc che vegn e l sarà compagnà te la neva profescion da Domenico Volcan, che l tolarà sù l’encèria de tutor: demò dò 1000 ores de lurier l nef colaborador podarà tor sù enstes la vida del presidie cultural de paìsc.

Daniele Verra l’à 28 egn, l’é laureà en letradura moderna, l’à lurà te Istitut Cultural Ladin desche archivist e da egn l colaborea con la redazion de La Usc di Ladins, olache l scrif de sport e auter e da doi egn l tegn vigni meis na rubrica de rezenjion de libres dal titol »Da la coroneles al cher«.

De più su La Usc stampèda de vender ai 20 de aost.  (Lucia Gross)