La Usc di Ladins

L’Union di Ladins de Fascia e l Grop Ladin da Moena à destinà chel tant che vegn int dal vener l liber sul Zerilo Bora al restaure del relief sora usc de Calonia. Duc i lurieres de abeliment de la neva ciasa, fata sù del 1948 dal Comun per librar i locai de la “calonega velgia” al ben de la Scola d’Art, i é stac fac dai scolees sot l endrez del Maester, se sà ben, a scomenzar dai 74 relieves ornamentai che fasc amò bela parbuda sot le gronde.

Trop più a demal l é enveze l’aut relief sora usc, restà egn e egn sot l temp. La Madona col Bambin l é beleche segur opera del Zerilo enstes, l angel a man dreta l é stat zipià da la Maria Lorenz e chel a cencia da la Emma Ferrari. En dut na bela composizion armoniosa, che la era ence depenta e l é gran ora che la vegne refiziada e metuda a salvament.

Enstadì l é stat fat la perizia del restaurador e la domana de finanziament ai ofizies de Trent. La Provinzia se tolarà su mesa la speisa e l Comun de Moena entervegn per l 25%. Ma l é de giusta che ence la sozietà zevila tole part a chesta operazion de gran segnificat cultural, ence per recordar l Zerilo Bora e per desmostrar mingol de recognoscenza per chel che l à fat per Moena, ensema con si arlieves.

Duc pel contribuir al restaure de chesta bela opera de art e i ciaparà debant na copia del liber dat fora dessema col Comun de Moena. Le bonaman va date aló da la senta de l’Union di Ladins a Sèn Jan (tel 0462 764545), opuramenter con bonifich sun cont de la Cassa Rurala Dolomites, IBAN: IT60 K081 4035 7800 0000 2040 349, causala: per l restaure del relief del Zerilo Bora.

 (lg)