La Usc di Ladins

»N popul zenza storia e zenza memoria l é n popul zenza doman!«. Le parole che ressona forte e chiare te Biblioteca del Istitut Cultural Ladin, dedant al bust de bron che fegura l Frate de Martin, le vegn fora da la bocia de David Dorich. Soa esprescion fona moscia duta la tenjion del ator, che l é dò a ge dar vita a P. Frumenzio Ghetta tel event ‘Do l vièl del saer’, la palesa l’emozion tel saer de aer dedant ence i parenc del gran storich fascian e la tema de no esser bon assà de l interpretar con dut l gran respet che ge pervegn a chesta fegura tant emportanta 

L é stat dalbon na gran endesfida chela che l se à metù dant chest’outa: interpretar adertura Pare Frumenzio, l Chimpl da Tamion, chel che à metù ju i fondamenc per poder cognoscer la storia e la cultura de Fascia, e che l é amò tel cher e tel pensier di fascegn.

N é passà de temp da canche David Dorich de Coloc da Poza, che ades l é ruà ti ‘anta’, l era amò n joenet e te na picola comedia l fajea la part feruscola de n cioch che giraa con n gial... L aea abù gran ejit, e ge aea sapù bel, ma dapò per n gran pez no l aea più abù ocajion de se sproar su na paladina: a Poza filodramatiche no n era e a chi da Ciampedel no l se aea fidà ge domanar…

La voa de teater ampò la cogn ge esser restada ite da enlouta e la é sutada fora de pien canche, beleche vint egn do e oramai doventà pare, l à abù l’ocajion de far comedia per i bec de la scolina: ge à sapù tant bel che l se à pissà de meter su n grop de teater e coscì l é nasciù i Bontemponi.

Do l tormen Vaia à scomenzà a ge rodolar per l ciaf a David l’idea de far na sort de monologh con protagonist n alber, che l recorda dut chel che l aea vedù tel temp, dant de vegnir dessatà. Coscì l é nasciù l spetacol ‘L’èlber conta-Le lëgn cunta’ che ades vegnarà portà dant amò per endrez del Comun general de Fascia: se podarà l veder ai 20 de november te La Gran Ciasa de Soraga.

De più su La Usc stampèda de vender ai 29 de otober.  (Lucia Gross)